Павел Дураў падтрымаў Майдан

Заснавальнік сацыяльнай сеткі «Вконтакте» апублікаваў відэа ў падтрымку пратэстных выступленняў на Украіне.

Відэа пад назвай «Страх» складзена з урыўкаў здымак пратэстных акцый на Украіне. На фоне здымак сутыкненняў пратэстуючых з сілавікамі голас за кадрам кажа пра страх і выбар, які прыходзіцца рабіць людзям. «Страх - гэта плён нашага ўяўлення... Небяспека - гэта рэальны факт, але страх – гэта твой выбар», - гаворыцца ў відэа.

«Зусім не важна, як ты ўдарыш, а важна - які трымаеш ўдар, як рухаешся наперад», - гаворыць голас на фоне кадраў са здзекаваннямі «Беркута» над актывістам Майдану Міхайлам Гаўрылюком. «Калі ведаеш чаго ты стаіш, ідзі і бяры сваё, але будзь гатовы трымаць удары. Чалавек сам наважвае, у які бок яму павярнуць», - гаворыцца таксама ў відэа.

З канца лістапада 2013 на Украіне праходзяць маштабныя акцыі пратэсту, якія могуць быць справакаваныя адмовай уладаў краіны падпісваць пагадненне аб асацыяцыі з ЕЗ. Пратэстныя выступы некалькі разоў перарасталі ў масавыя беспарадкі. 18 лютага сітуацыя на Украіне абвастрылася: у цэнтры Кіева пачаліся жорсткія сутыкненні пратэстуючых з міліцыянтамі і байцамі ўнутраных войскаў МУС. У выніку загінулі 77 чалавек, блізу 600 чалавек пацярпелі.

21 лютага прэзідэнт Украіны Віктар Януковіч абвясціў аб правядзенні датэрміновых прэзідэнцкіх выбараў да канца 2014 года. Таксама ён паабяцаў ініцыяваць зварот да канстытуцыі ўзору 2004 года, якая абмяжоўвае паўнамоцтвы прэзідэнта. Акрамя таго, Вярхоўная Рада прыняла закон, які выключаў крымінальны пераслед для ўдзельнікаў беспарадкаў, і прагаласавала за вызваленне экс-прэм'ера Украіны Юліі Цімашэнкі.