ВНУ зменяць правілы прыёму
2- 24.02.2014, 10:00
- 3,298
Лукашэнка даручыў адрэдагаваць правілы прыёму ў ВНУ.
Гэта, паводле паведамлення прэс-службы кіраўніка, будзе зроблена для таго, каб даць больш магчымасцяў для паступлення здольным хлопцам з глыбінкі, якія ў працэсе вучобы могуць паказаць добрыя вынікі нават у параўнанні са студэнтамі з сталіцы». Лукашэнка паведаміў пра новаўвядзенні 23 лютага падчас размовы з жыхарамі Менска пасля ўскладання кветак на Плошчы Перамогі.
Разам з тым ён лічыць, што ў цэлым у Беларусі "занадта размахнуліся па вышэйшай адукацыі".
Паводле слоў Лукашэнкі, лік тых, хто скончыў ВНУ, значна павялічыўся нават у параўнанні з савецкім перыядам, а спецыялісты па асобных напрамках аказваюцца не запатрабаванымі на рынку працы. Пры гэтым у частцы выпускнікоў завышаныя чаканні з нагоды далейшага працаўладкавання.
"Дыплом атрымаў, не важна нават як, і ён лічыць, што яму заўтра Лукашэнка павінен даць вялікі стол і крэсла. Не ведаю. Гэта, напэўна, няправільны падыход", - упэўнены Лукашэнка.
Адносна неабходнасці амаладжэння кадраў у сферы адукацыі Лукашэнка выказаў меркаванне, што "нельга дапусціць страты вопыту, які ёсць у выкладчыкаў старэйшага пакалення".
Кіраўнік згадаў і пра нядаўнюю нараду па пытанні працы індывідуальных прадпрымальнікаў, многія з якіх у пачатку 90-х гадоў мінулага стагоддзя былі вымушаныя прыйсці ў гандаль менавіта са сферы адукацыі.