Два чыноўнікі МУС Украіны затрыманыя паводле справы аб выкраданні дэманстрантаў

У справе аб выкраданні актывістаў Ігара Луцэнкі і Юрыя Вярбіцкага затрыманыя два высокапастаўленыя чыноўнікі МУС.

Аб гэтым паведамляецца на старонцы "Батькивщины" у "Твітэры". Таксама адзначаецца, што справа актывісткі і журналісткі Таццяны Чарнавол, жорстка збітай невядомымі перакваліфікавана паводле артыкула "замах на забойства".

Нагадаем, львоўца Юрыя Вярбіцкага выкралі з Аляксандраўскай лякарні разам з актывістам Ігарам Луцэнкам раніцай 21 студзеня. Луцэнка прывёз у лякарню Вярбіцкага з траўмай вока.

Потым іх кудысьці павезлі, доўга трымалі ў нейкім гаражы і білі. Затым Луцэнку з мяшком на галаве вывезлі ў лес, паставілі на калені тварам да дрэва і пакінулі. Ён змог выбрацца, а Вярбіцкага знайшлі мёртвым у тым жа раёне праз некалькі дзён з шматлікімі слядамі катаванняў.