Дземідзенку і Крамянецкага прысудзілі да 10 дзён арышту

Актывістаў «Маладога фронту» прысудзілі да арышту нібыта за брыдкую лаянку.

22 лютага актывістаў затрымалі на ўкраінскай мяжы, паставілі штампы аб забароне на ўезд на тэрыторыю Украіны на 5 гадоў і адвезлі на беларускі бок. Пасля гэтага на мяжы з'явіліся міліцыянты, якія затрымалі хлопцаў за тое, што тыя нібыта брыдка лаяліся, піша ПЦ «Вясна».

Увесь гэты час актывісты знаходзіліся ў Ельскім РАУС. На іх былі складзеныя пратаколы аб адміністрацыйным правапарушэнні, падмацаваныя пяццю рапартамі міліцыянтаў і пратаколамі апытання двух іншых затрыманых у РАУС.

Маладафронтаўцы Мікола Дземідзенка і Зміцер Крамянецкі адмаўлялі сваю віну. Нягледзячы на гэта, суддзя Іван Пятровіч прысудзіў актывістаў да 10 дзён арышту.

Нагадаем, падчас папярэдняга візіту на Майдан (10-20 снежня) з актывістаў узялі падпіску аб няўдзеле ў пратэстных акцыях на тэрыторыі Украіны.