The Wall Street Journal: Украіна - пытанне жыцця і смерці для Пуціна

Без Украіны Расея больш не імперыя.

Амерыканскае выданне The Wall Street Journal згодна з гэтай ацэнкай Збігнева Бжэзінскага і адзначае, што заходнія дыпламаты вельмі часта паўтараюць зараз фармулёўку "асіметрыя інтарэсаў". Яна азначае, што для Уладзіміра Пуціна, у адрозненне ад лідараў Захаду, "лёс Украіны - гэта пытанне жыцця і смерці, жыццёва важнае для дасягнення яго мэты - аднаўлення глабальнага ўплыву Расеі за кошт збівання блока з суседзяў па былым Саюзе, кіраванага з Масквы".

Украіна, "калыска рускай нацыі", уяўляе сабой самы важны прыз, "без якога крамлёўскі блок будзе мёртванароджаным", піша галоўная дзелавая газета Амерыкі.

Але для ЗША і буйных еўрапейскіх дзяржаў лёс Украіны не быў адным з галоўных прыярытэтаў, працягвае Wall Street Journal. Вашынгтон імкнуўся заручыцца падтрымкай Крамля ў такіх пытаннях, як Сірыя і Іран, і таму спускаў на тармазах рэгіянальныя спрэчкі з Расеяй, перадае BBC.

Еўрапейцы таксама не лезлі на ражон. Як вобразна выказаўся Эндру Уілсан з Еўрапейскай рады па міжнародных адносінах, Брусель "явіўся на панажоўшчыну з багетам".

Нагадаем, палітычны крызіс пачаўся на Украіне ў канцы лістапада 2013 года, калі Кабмін абвясціў аб прыпыненні еўраінтэграцыі. Масавыя акцыі прайшлі па ўсёй Украіне і ў студзені выліліся ў сутыкненні з міліцыяй.

Маштабныя вулічныя беспарадкі аднавіліся 18 лютага, у выніку загінулі больш за 100 чалавек, амаль 700 пацярпелі.