Расейскі тур гурта «Океан Ельзи» пад пытаннем

Міністэрства культуры РФ паставіла пад пытанне расейскія гастролі ўкраінскага гурта «Океан Ельзи».

Пра гэта паведамляе «Інтэрфакс» са спасылкай на крыніцу, блізкую да кіраўніцтва міністэрства.

Па дадзеных крыніцы, у гурта ўзніклі «супярэчнасці фінансавага і тэхнічнага характару з арганізатарамі гастроляў у Расеі», піша Lenta.ru.

Пры гэтым мэнэджэр гурта Вікторыя Хаменка заявіла, што ніякіх супярэчнасцяў з арганізатарамі ў «Океан Ельзи» няма. «Гастролі адбудуцца, усё па плане», - сказала яна.

Раней да міністра культуры РФ Уладзіміра Мядзінскага звярнуўся дэпутат заканадаўчага сходу Санкт-Пецярбурга Віталь Мілонаў, які запатрабаваў адмяніць гастролі «Океан Ельзи» у Пецярбургу і іншых гарадах Расеі. «Лічу, што мэтазгодным таксама будзе ўнесці ў спіс непажаданых для ўезду ў Расею асоб кіраўніка ансамбля Святаслава Вакарчука як актыўнага і непрымірымага суперніка расейскай дзяржавы», - напісаў Мілонаў у заяве.

Святаслаў Вакарчук і «Океан Ельзи» з'яўляюцца актыўнымі прыхільнікамі змены ўлады на Украіне. Вакарчук уваходзіць у Круг народнага даверу Майдана. Пры гэтым гурт рэгулярна гастралюе ў Расеі, а сам Вакарчук ахвотна гаворыць па-руску і ставіцца да Расеі добра. «Я лічу, што культура ў прынцыпе павінна ўсіх аб'ядноўваць. Тым больш калі гаворка пра нашы народы, якія - я скажу гэта без усялякага пафасу - сапраўды з'яўляюцца брацкімі, таму што ў іх агульныя карані, агульная гісторыя. Але гэта зусім не значыць, што мы павінны аб'ядноўвацца палітычна. Палітычна кожны народ павінен жыць так, як яму зручней. Мне здаецца, што мы проста павінны сябраваць і дасягаць адзінства дзякуючы культуры, а ў палітыцы хай нашы шляхі будуць рознымі», - казаў ён, напрыклад, у інтэрв'ю выданню «Взгляд».

У канцы лютага 2014 года на Украіне адбылася змена ўлады, якой папярэднічаў працяглы палітычны крызіс. Ён выліўся ў вулічныя баі паміж сілавікамі, якія абаранялі прэзідэнта Віктара Януковіча, і апазіцыяй. У выніку сутыкненняў, па афіцыйных дадзеных, загінулі 82 чалавекі, у тым ліку 16 супрацоўнікаў правапарадку. Па версіі Майдана, толькі з боку пратэстоўцаў былі забітыя не менш за сто чалавек. Беспарадкі скончыліся тым, што Януковіч уцёк з Кіева, а ў Вярхоўнай Радзе ўтварылася канстытуцыйная большасць, якая падтрымлівае апазіцыю. Пасля гэтага парламент прызначыў часовага прэзідэнта, а Януковіч быў абвешчаны ў вышук. У Расеі новую ўкраінскую ўладу пакуль не прызналі. Прэм'ер-міністр Дзмітрый Мядзведзеў заяўляў, што не бачыць легітымных партнёраў сярод лідараў Майдана.