Януковіч скраў першую ўкраінскую друкаваную кнігу
8- 25.02.2014, 18:09
- 3,872
Сёння ноччу байцы Самаабароны, "Правага Сектара" і актывісты Аўтамайдану знайшлі сховішча каштоўных кніг у рэзідэнцыі Межыгор'і.
Пра гэта паведамляе журналіст Зміцер Гнап.
"Убачанае проста ўзрушыла. Януковіч прымудрыўся выкрасці славутасці ўкраінскай пісьменнасці. І кінуў старажытную бібліятэку, ратуючыся ад гневу людзей", - піша Гнап.
У прыватнасці, сярод многіх старажытных кніг быў знойдзены "Апостал" Івана Фёдарава. Гэта першая ўкраінская кніга. З яе пачалося айчыннае кнігадрукаванне, паведамляе УНІАН.
"Выкрасці "Апостал" - усё роўна, што скрасці Сафійскі сабор", - сцвярджае журналіст.
Тое, што гэта арыгінал, пацвярджаецца навуковай даведкай Музея кнігі і кнігадрукавання Украіны, падпісанай намеснікам дырэктара Л. Хаўхаю.
Таксама, сярод помнікаў украінскага кнігадрукавання ў Межыгор'і ляжаць "Мінея агульная" І. Гізела 1680-га года, "Апостал" Г. Слёзкі 1654-га года, Евангелле 1704-га года, і іншыя неацэнныя скарбы ўкраінскай пісьменнасці. Усе з адпаведнымі навуковымі высновамі аб арыгінальнасці.
Гэтыя кнігі павінны былі знаходзіцца ў сховішчах дзяржаўных музеяў.
"На сёння кіеўскія выданні з'яўляюцца рэдкасцю, яны перажылі войны, цэнзурныя пераследы, стыхійныя бедствы. Буйныя пажары 1772-га і 1849-га гадоў, якія знішчылі Лаўрскую бібліятэку", - гаворыцца ў адной з экспэртных высноў.
Беларус Іван Фёдараў традыцыйна ўважаецца за "першага рускага кнігадрукара". Ён выдаў першую дакладна датаваную друкаваную кнігу ("Апостал") на тэрыторыі Маскоўскага царства. Пасля выгнання з Масквы Іван Фёдараў працаваў у Львове. Менавіта ў гэтым горадзе ён выдаў першую друкаваную кнігу на ўкраінскай мове.