Google стварыла інтэрактыўную мапу высечкі лясоў на Зямлі

Карпарацыя Google прадставіла праект Global Forest Watch, распрацаваны сумесна з Інстытутам сусветных рэсурсаў і яшчэ 40 арганізацыямі.

З дапамогай гэтага праекта ў рэжыме рэальнага часу можна сачыць за высечкай лясоў па ўсёй планеце. Падрабязнасці раскрывае ў сваім блогу на сайце "Хабрахабр" карыстач alizar.

Мапа на сайце праекта фармуецца за кошт фатаграфій са спадарожнікаў NASA за апошнія 13 гадоў. Пры гэтым алгарытмы апрацоўкі малюнкаў дазваляюць дэталёва падлічыць аб'ёмы страчаных і новых лясоў на кожнай тэрыторыі і ў кожнай краіне, па гадах. Так, статыстыка па Расеі за перыяд з 2000 па 2012 год абвяшчае, што краіна страціла 36,5 мільёна гектараў лесу, у той час як з'явілася ўсяго 16 мільёнаў гектараў. Гэты паказчык з'яўляецца рэкордным сярод усіх краін свету. На другім месцы па гэтым паказчыку ідзе Бразілія, а трэці радок займаюць ЗША.

Практычна ні адна дзяржава не можа пахваліцца тым, што плошча лясоў на яе тэрыторыі за апошнія гады вырасла. У гэты невялікі пералік патрапілі, сярод іншых, Егіпет, Сінгапур і Палестына.

У прэс-рэлізе праекта адзначаецца, што звычайна да таго моманту, калі людзі даведваюцца аб высечцы лесу, ужо занадта позна што-небудзь распачаць. Навукоўцы стагоддзямі вывучаюць лес, паказваючы на жыццёвую важнасць гэтай экасістэмы для чалавечага грамадства. Але большасць да гэтага часу не мае своечасовай і дакладнай інфармацыі аб тым, дзе, калі і чаму лясы знікаюць. Праект, кошт якога склаў 25 мільёнаў даляраў, закліканы пераламаць гэтую сітуацыю. Для зручнасці карыстальнікаў на сайце павінен з'явіцца сэрвіс абвестак, якія будуць апавяшчаць аб высечцы лесу ў зададзенай мясцовасці.

Каментатары, зрэшты, паказваюць, на агрэхі мапы. Так, адзін з карыстальнікаў адзначыў, што ў добра знаёмым яму лесе пазначаныя высечкі на паляне, дзе дрэў ніколі не было.