Амерыканец устанавіў рэкорд па кульках у паветры
- 26.02.2014, 16:07
- 2,885
У Лас-Вегасе ўстаноўлены сусветны рэкорд па колькасці кулькоў наперад, зробленых у аэрадынамічнай трубе на працягу адной хвіліны.
Аўтарам дасягнення стаў Брэд Хес, які здзейсніў 53 перавароты за 60 секунд.
Па словах самога Хеса, ён трэніраваўся ў трубе каля дзесяці гадоў. Праводзіць час у аэрадынамічным збудаванні яму дазваляла тая акалічнасць, што ён з'яўляецца супрацоўнікам прадпрыемства, якое валодае трубой. Рэкардсмен адзначыў, што падчас трэніровак выконваў 200-300 кулькоў штодня. Ён прызнаўся, што гэта запатрабавала вялікай трываласці піша Lenta.ru.
Як падкрэсліў Хес, адчуванні, якія ўзнікаюць пры кручэнні ў паветры, падобныя з ап'яненнем: «Як быццам ты напіўся і спрабуеш ісці прама».
Рэкорд Хеса быў афіцыйна занесены ў Кнігу рэкордаў Гінеса. Жыхар Лас-Вегаса перасягнуў папярэдняе дасягненне на 16 кулькоў.
Згодна з Кнігай, найноўшы рэкорд колькасці кулькоў назад у паветры за хвіліну належыць жыхарцы Сінгапура Кіры По. Яна перакулілася ў трубе праз галаву 68 раз.