Дмытро Яраш: Януковіч падчас нашай сустрэчы выглядаў спалоханым
9- 26.02.2014, 21:39
- 4,905
Лідар «Правага сектара» пацвердзіў сваю сустрэчу з былым прэзідэнтам Віктарам Януковічам 20 лютага.
Пра гэта ён заявіў у інтэрв'ю выданню «Украинский тыждень».
«Цяпер распаўсюджваецца нямала інфармацыі аб маёй таемнай сустрэчы з Януковічам. Яна сапраўды была, але ўжо пасля заканчэння актыўных дзеянняў сілавікоў. Выйшлі СБУшнікі і прапанавалі не толькі мне, але і майму бліжэйшаму атачэнню, сустрэцца для спынення кровапраліцця, - распавёў Дмытро Яраш. - Адпаведна, я паехаў у адміністрацыю».
Са слоў лідара «Правага сектара», Януковіч прапаноўваў яму падпісаць пагадненне аб спыненні канфлікту.
«Я адмовіўся гэта зрабіць. Сказаў, што мы марыянеткамі ніколі не былі і не будзем. І, Віктар Фёдаравіч, давайце выводзьце войскі, бо пачнецца партызанская вайна ва ўсёй Украіне, - распавёў Яраш. - Пры гэтым гаварылася, што мы не адступім, што не складзем зброю, будзем стаяць да канца. Я не бяру гэтую заслугу на сябе, бо на яго ціснулі і дыпламаты, але магчыма гэта для яго стала таксама пэўнай кропелькай, калі ён пастанавіў спыніць так званую антытэрарыстычную аперацыю і адвесці войскі».
Са словах Яраша, Януковіч выглядаў спалоханым.
«Хоць ён разбурыў пэўныя мае стэрэатыпы, бо я ніколі з ім не сустракаўся. Мне здавалася, што ён дурнейшы. А ён так стараўся нешта фармуляваць... Але відаць было, што ён знясілены і спалоханы», - дадаў Яраш.
Ён адзначыў, што размова доўжылася нядоўга. На пытанне, ці баяўся ён ехаць на Банкавую, лідар «Правага сектара» адказаў: «Баяўся. Я думаў не вярнуся»..
Фота: Sergei Supinsky/AFP