«Белмедпрэпараты»: Нашы лекі не горш за імпартныя

Мінздраў працягвае барацьбу з імпартнымі лекавымі сродкамі.

Доля айчынных прэпаратаў у агульным аб'ёме лекавых сродкаў, што рэалізуюцца на тэрыторыі Беларусі, дасягнула 36%. У 2014 годзе плануецца давесці гэтую лічбу да 42%.

Начальнік вытворчасці прадпрыемства «Белмедпрэпараты» Наталля Нячай сцвярджае, што беларусам не варта баяцца знікнення імпартных лекаў з беларускіх аптэк, пра што яна заявіла ў інтэрв'ю «Вечернему Минску».

- Існуе меркаванне, што айчынныя прэпараты больш слабыя, чым імпартныя аналагі.

- Нават калі ёсць выбар, аддаю перавагу сваім. Я, як гаспадыня, якая сама гатуе боршч або хатнюю каўбасу, ведаю, што туды паклала і які на выхадзе атрымаўся прадукт. Так і з лекамі. Сыравіну прадпрыемства закупляе там жа, дзе і вядучыя фармацэўтычныя кампаніі свету, і толькі тыя субстанцыі, якія зарэгістраваныя нашым Мінздравам.

Абсалютна ўсё, што бярэцца для вытворчасці, праходзіць стоадсоткавы ўваходны кантроль. І калі мы выпускаем айчынны аналаг імпартнага прадукта, то дакладна паўтараем формулу яго распрацоўніка. Пры гэтым прэпарат усё роўна праходзіць клінічныя выпрабаванні, пацвярджаючы яго ідэнтычнасць арыгіналу.

Таму смела магу запэўніць, што айчынныя лекі дзейнічаюць гэтак жа, як імпартныя. Але па кошце ў разы танней. Гэта і выклікае сумнеў у некаторых спажыўцоў. Аднак наша прадпрыемства дзяржаўнае і сацыяльна арыентаванае. На шэраг лекавых сродкаў кошты рэгулююцца дзяржавай.

Нагадаем, у апошні час Міністэрства аховы здароўя Беларусі праславілася барацьбой з імпартам, што прывяло да дэфіцыту жыццёва важных лекаў на беларускім рынку.