У Кітаі пабудуюць гатэль у форме арганічнай клеткі
3- 27.02.2014, 21:00
- 3,503
Кітайскія архітэктары працягваюць здзіўляць свет.
Спецыялісты бюро Graft Lab Architects і Penda Design House аб'ядналі намаганні ў працы над сумесным праектам гатэля Myrtle Garden у кітайскім Сян’яне. Будынак арганічнай формы часткова ўпісаны ў схіл пагорка і размесціцца ў найбуйнейшым міртавым садзе на тэрыторыі Азіі, паведамляе сайт architector.ua.
Гармонія паміж прыродай і архітэктурай прасочваецца ў форме пабудовы - яна выканана ў выглядзе арганічнай клеткі.
З поўначы гатэль ідэальна ўпісваецца ў навакольны ландшафт і адкрываецца на поўдзень і маляўнічыя віды возера. Унутраная праграма структуры на цокальным узроўні падзяляецца на рэстаран, зону адпачынку і дзелавыя прасторы. Арыентацыя гатэля Myrtle Garden дазваляе атрымаць максімум натуральнага святла для ўнутраных прастораў і дастатковай вентыляцыі. Акрамя таго, на даху прадугледжаны сістэмы збору і захоўвання дажджавой вады для другаснага яе выкарыстання ў гаспадарчых патрэбах і для паліву саду.