Андрэй Залатароў: Захад дамовіўся з Расеяй па Украіне

Ніхто не хоча атрымаць другую Югаславію, лічыць украінскі эксперт.

Такое меркаванне выказаў кіраўнік аналітычнага цэнтра «Трэці сектар» Андрэй Залатароў, каментуючы сайту charter97.org апошнія падзеі ва Украіне.

«Відавочна тое, што Мюнхенская канферэнцыя зафіксавала кансенсус Еўропы, ЗША і Расеі адносна ўкраінскага крызісу. Стала зразумела, што атрымаць другую Югаславію з атамнымі электрастанцыямі і кучай зброі ніхто не хоча. Мэта кансенсусу ў тым, што сапраўды павінны быць прынятыя змены ў Канстытуцыі. І на авансцэну выходзіць ужо не Клічко, Яцанюк або Цягнібок, а дуэт Парашэнка - Клічко. Парашэнка павінен узначаліць урад, які атрымае дадатковыя паўнамоцтвы за кошт гэтай канстытуцыйнай рэформы, а паўнамоцтвы прэзідэнта павінны быць зрэзаныя. За рамкамі, зразумела, застаецца народ і інтарэсы Віктара Януковіча, але гэта такі элітны кампраміс», - сказаў ён.

На думку аналітыка, сутнасць дамоўленасцяў - улік эканамічных інтарэсаў Расеі, у тым ліку ў газавай сферы, але палітычная дамінанта Захаду.

«Гэта прадугледжвае падпісанне пагаднення аб еўраінтэграцыі, прадугледжвае, магчыма, у хуткім часе выхад на свабоду Юліі Цімашэнка, але гэта пагадненне не прадугледжвае якой будзе рэакцыя Віктара Януковіча і яго бліжэйшага акружэння. І мяркуючы па тым, што яно люта і жорстка супраціўляецца рэалізацыі гэтага варыянту, то не выключана, што гэты кансэнсус можа ў бліжэйшы тыдзень так і не пачаць працаваць. Гэта значыць, гэтыя змены могуць быць заблакаваныя, але гэта азначае тое, што ўкраінскі крызіс выйдзе на іншы віток, і мы можам сутыкнуцца з досыць жорсткімі сцэнарамі. Але пасля гэтага павінны будуць уключыцца і карныя санкцыі з боку ЕЗ і ЗША ў адносінах да алігархаў, якія падтрымліваюць Януковіча. А гэтыя алігархі, ні многа, ні мала, кантралююць 80 дэпутатаў Вярхоўнай Рады», - адзначыў эксперт.

Па словах палітолага, «калі гэты новы алігархічны кансенсус пачне працаваць, то дасць магчымасць на нейкі час зняць вастрыню крызісу, прыбраць барыкады з Грушэўскага, але не вырашыць ніводнай з праблем, якія вывелі людзей на Майдан».

«Гэта значыць, услед за лютым, прыходам да ўлады часовага ўрада і Пятра Парашэнкі, які мне вельмі нагадвае князя Львова, будзе кастрычнік, які можа прайсці ў больш жорсткіх і рашучых формах. Толькі пытанне, хто будзе ў якасці Леніна на браневіку, застаецца адкрытым», - сказаў на заканчэнне Андрэй Залатароў.

Нагадаем, бестэрміновая акцыя пратэсту, якая пачалася ў Кіеве пасля адмовы ўладаў Украіны ад падпісання Пагаднення аб асацыяцыі з ЕЗ, працягваецца па ўсёй краіне ўжо больш за два месяцы. Да 22 студзеня асноўныя пратэстныя дзеянні праходзілі ў сталіцы. У гэты дзень сітуацыя ў цэнтры горада была асабліва напружанай: сутыкненні з сілавікамі скончыліся ахвярамі сярод дэманстрантаў.

На працягу апошняга тыдня студзеня пратэсты перамясціліся ў рэгіёны. Імі былі ахоплены не толькі заходнія вобласці, якія традыцыйна лічацца апорай апазіцыі, але і цэнтр і ўсход краіны. У выніку ўлады пайшлі на саступкі і прэм'ер-міністр Украіны Мікалай Азараў падаў у адстаўку, а «законы пра дыктатуру» былі адмененыя. Аднак прыняты Вярхоўнай Радай закон аб амністыі не быў узгоднены з апазіцыяй, таму яна адмовілася выконваць яго.

Фота: glavcom.ua