Кэтрын Эштан: ЕЗ гатовы аказаць Украіне фінансавую дапамогу
7- 6.02.2014, 13:18
- 6,543
Еўразвяз гатовы аказаць Украіне фінансавую дапамогу пры ўмове, што краіна пойдзе па шляху эканамічных рэформаў.
Пра гэта заявіла пасля сустрэч з прадстаўнікамі ўладаў і апазіцыі ў Кіеве вярхоўны прадстаўнік ЕЗ па замежных справах і палітыцы бяспекі Кэтрын Эштан, перадае УНІАН.
"І, вядома, мы абмяркоўвалі эканамічныя пытанні. Я не раз казала ў мінулым месяцы пра тое, як важна падтрымаць эканоміку Украіны. Не без умоваў: нам вельмі важна бачыць неабходныя эканамічныя рэформы, таму што гэта будзе рэальная фінансавая падтрымка і ўкладанне. Гэта азначае, што яна будзе не кароткатэрміновай, а доўгатэрміновай. Гэтая дапамога дасць магчымасць развівацца не толькі тым эканамічным абласцям, якія і так развіваюцца, але і іншым", - заявіла яна.
Таксама Еўрапейскі Звяз прапаноўвае Украіне падтрымку ў расследаванні фактаў гвалту падчас акцый пратэсту.
Пра гэта заявіла прадстаўнік ЕЗ па пытаннях знешняй палітыкі і палітыцы бяспекі, віцэ-прэзідэнт Еўрапейскай камісіі Кэтрын Эштан на прэс-канферэнцыі ў сераду ў Кіеве, перадае Інтэрфакс-Украіна.
Яна адзначыла, што, нягледзячы на памяншэнне выпадкаў гвалту падчас пратэстаў, у еўрапейскага боку застаецца занепакоенасць сітуацыяй у краіне.
У прыватнасці, па яе словах, гэта датычыцца і таго, ці будуць адказваць асобы, якія ўжылі гвалт.
Раней прэзідэнт Украіны Віктар Януковіч сустрэўся з віцэ-прэзідэнтам Еўрапейскай камісіі Кэтрын Эштан, каб абмеркаваць перспектывы канстытуцыйнай рэформы ва Украіне і апошнія падзеі ў краіне.