Пацярпелыя актывісты Еўрамайдану пройдуць лячэнне ў Польшчы
- 6.02.2014, 20:54
- 4,585
Украінцы будуць лячыцца ў шпіталі Міністэрства ўнутраных спраў Польшчы.
Польшча сёння прыняла на лячэнне першых чатырох грамадзян Украіны, якія пацярпелі падчас акцый пратэсту ў Кіеве, паведамляе прэс-служба польскага МЗС 6 лютага.
«Кіруючыся гуманітарнымі матывамі, Польшча запрасіла на лячэнне чатырох грамадзян Украіны, якія пацярпелі ў выніку сутыкненняў, якія адбыліся ў Кіеве ў студзені гэтага года. У чацвер, 6 лютага, яны прыехалі ў нашую краіну», - гаворыцца ў паведамленні.
Украінцы будуць лячыцца ў шпіталі Міністэрства ўнутраных спраў Польшчы, паведамляе УНІАН.
«Польшча гатовая яшчэ прыняць пацярпелых падчас акцый ва Украіне. Лячэнне ў Польшчы пацярпелых з Украіны з'яўляецца магчымым дзякуючы супрацоўніцтву Міністэрства замежных спраў, Міністэрства ўнутраных спраў і Міністэрства аховы здароўя», - адзначыла прэс-служба.
МЗС Польшчы таксама ў чарговы раз заклікаў удзельнікаў супрацьстаяння ва Украіне ўстрымацца ад гвалту і знайсці кампраміс для дазволу цяперашняга палітычнага крызісу.