Беларускае войска правядзе вучэнні ля межаў Украіны
14- 7.02.2014, 18:31
- 12,891
Тактычныя вучэнні з баявой стральбой ЗРК «Тор-М2» 120-й зенітнай ракетнай брыгады пройдуць на палігоне Палескі 25-28 лютага.
Пра гэта паведамляе «Беларуская вайсковая газета».
«Сёння, 7 лютага, першая калона (тылавая) тэхнікі 120-й зенітнай ракетнай брыгады прыбыла на палігон Палескі, дзе ў канцы лютага 3-й батарэі ЗРК «Тор-М2» трэба будзе паўдзельнічаць у тактычным вучэнні з баявой стральбой, - інфармуе газета. - Гэтае вучэнне будзе праводзіцца згодна з планам баявой падрыхтоўкі ВПС і войскаў СПА з 25 па 28 лютага на палігоне Палескі».
Да пачатку вучэнняў вайскоўцам трэба будзе вырашыць цэлы комплекс задач: здзейсніць амаль 300-кіламетровы марш, стварыць на тэрыторыі палігона намётавы гарадок, натуральна, правёўшы ўсе неабходныя мерапрыемствы па тактычнай маскіроўцы, забеспячэнню аховы асабістага складу і баявых машын.
Выданне адзначае, што зенітныя ракетныя комплексы «Тор-М2» ужо былі выпрабаваныя беларускімі вайскоўцамі на палігоне Ашулук (Расея).
«Дзеянні асабістага складу і тэхніка былі ацэнены на выдатна. Тады воіны-ракетчыкі стралялі ў спякоту, таму было пастаноўлена праверыць, як павядзе сябе сучасная баявая тэхніка ва ўмовах беларускай зімы», - піша газета.
Нагадаем, некалькі месяцаў таму на тэрыторыі Беларусі прайшлі сумесныя вайсковыя вучэнні «Захад-2013» з удзелам расейскага войска.