Кіраўніцтва РФ адмаўляецца размаўляць з уладамі Украіны

Спроба МЗС Украіны арганізаваць размову Яцанюка з Мядзведзевым таксама скончылася няўдачай.

Расейскія міністры не бяруць трубкі, калі ім тэлефануюць ўкраінскія калегі. Такая сітуацыя высветлілася пад час сённяшняга пасяджэння Кабінета міністраў Украіны, паведамляе ЛІГАБізнесІнформ.

В.а. міністра замежных спраў Андрэй Дзешчыца паведаміў, што Украіне цяпер не вядомая пазіцыя расейскага боку наконт кансультацый у рамках Будапешцкага мемарандума.

«Мы звярнуліся да расейскай стараны з просьбай кансультацый з намі. Я гатовы гаварыць са спадаром Лаўровым. Мы прасілі аб тэлефоннай размове паміж вамі (прэм'ерам Арсеніем Яцанюком, - рэд.) І спадаром Мядзведзевым, аднак адказу расейскай стараны не атрымалі», - распавёў в. а. міністра.

Дзешчыца выказаў надзею, што іншым удзельнікам Будапешцкага мемарандума - Вялікабрытаніі і ЗША - пашанцуе больш, і яны змогуць дамовіцца з расейскай стараной.

Пры гэтым прэм'ер Арсень Яцанюк папрасіў сябраў урада звязацца праз тэлефоне са сваімі калегамі ў Расеі.

«Юра, гэта, у першую чаргу, вас тычыцца», - сказаў Яцанюк, звяртаючыся да міністра вугальнай прамысловасці і энергетыкі Юрыя Продана. На гэта Продан адзначыў: «Перш за ўсё, трэба высветліць, ці прызнае расейская сторана ўкраінскіх міністраў. Я тэлефаную, але мяне не злучаюць».

Яцанюк адзначыў, што ў тэлефонай размове канцлера Германіі Ангелы Меркель з прэзідэнтам Уладзімірам Пуціным кіраўнік расейскай дзяржавы сказаў, што расейская старана чакае кантактаў з украінскімі міністрамі.

«Менавіта таму я звяртаюся да сябраў Кабміна, калі ласка, выйдзіце на кантакт з вашымі калегамі. Аляксандра Шлапака, я прашу выйсці на міністра фінансаў Расеі. Нагадаю, што быў падпісаны шэраг абавязанняў з боку Расеі ў фінансаванні ўкраінскага бюджэту. Нам было б цікава ведаць пазіцыю Расеі, ці выконвае яна свае двухбаковыя абавязанні», - адзначыў прэм'ер.