Турцыя гатовая дапамагчы Украіне ў Крыме
- 1.03.2014, 21:17
- 24,130
Афіцыйная Анкара гатовая надаць дапамогу для стабілізацыі сітуацыі.
Пра гэта сёння пасля перамоваў з в.а. кіраўніка МЗС Украіны Андрэем Дзешчыцам заявіў міністр замежных спраў Турцыі Ахмет Давутаглу, паведамляе ЕспрессоТВ.
"Турцыя гатовая зрабіць усё, што ад яе залежыць, для таго, каб тыя праблемы, якія існуюць у Крыме, былі развязаныя мірным шляхам", - запэўніў турэцкі дыпламат.
Ён выказаў глыбокую занепакоенасць у сувязі з падзеямі на крымскім паўвостраве, і выказаў надзею на мірнае ўрэгуляванне канфлікту.
"Крым не павінен быць цэнтрам ваеннага напружання. Ён павінен быць цэнтрам турызму і росквіту", - сказаў ён.
Давутаглу таксама заклікаў усіх жыхароў Крыма рабіць усё магчымае для вяртання сітуацыі ў мірнае і спакойнае рэчышча.
"Для нас важна, каб крымскія татары ў Крыме жылі ў міры і згодзе з іншымі этнічнымі групамі на гэтым паўвостраве", - падкрэсліў ён.
Раней у сваёй заяве Давутаглу заявіў пра тое, што Турцыя выступае за тэрытарыяльную цэласнасць, мір, стабільнасць і росквіт Украіны. Кіраўнік турэцкага МЗС адзначыў важнасць Крыма як брамы ва Украіне, як месца пражывання татараў і багатай культурнай спадчыны, а таксама заклікаў да захавання міру на паўвыспе.