The Wall Street Journal: Тое, што адбываецца ва Украіне, усяляе жах у Пуціна

Расея ваюе не з тым, што ўяўляе сабой Украіна сёння, а з тым, чым яна можа стаць заўтра.

Пуціну трэба скажаць і дэманізаваць вобраз новай краіны. Праўда аб тым, што адбываецца ва Украіне, выклікае ў ім жах, піша член рэдакцыйнага савета The Wall Street Journal (пераклад - Inopressa.ru) Мэцью Камінскі. Ва Украіне тэлебачанне распаўсюджвае цікавыя навіны, журналісты раскопваюць брудныя справы дзяржавы, Майдан - цуд, які сведчыць, што грамадства "адкінула рэшткі пасіўнасці, выхаванай савецкім перыядам", па выразе аўтара.

Крушэнне "карумпаванага палітыка савецкага тыпу, створанага па яго вобразу і падабенству" - удар, нанесены зусім блізка ад Пуціна. Нішто (акрамя жартаў над яго ростам) так не раздражняе Пуціна, як народныя рэвалюцыі, лічыць аўтар. "Плюс дыскамфорт пры позірку на новых кіраўнікоў Кіева", - працягвае ён. Яцанюк паляцеў на саміт у Брусэль камерцыйным рэйсам, новы міністр эканомікі ездзіць на працу на метро. "Гэтыя парасткі транспарэнтнасці і сціпласці кантрастуюць з начальніцкімі манерамі крамлёўскіх кіраўнікоў", - гаворыцца ў артыкуле.

"Украіна - альтэрнатыва расейскаму аўтарытарнаму праекту", - кажа гісторык і актывіст Уладзімір Вайтовіч. Пуцін прапаноўвае адроджаную імперыю, а Украіна хоча інтэгравацца ў Захад, Украіна дазваляе палітычныя свабоды, а Крэмль саджае Навальнага пад хатні арышт і цісне на тэлеканал "Дождь".

"Пуцін прасоўвае Расею як нацыяналістычны, праваслаўны, славянскі бастыён на шляху геяў і іншага ўпадніцкага "імпарту" з Захаду. Цяперашняя Украіна адказвае свабодай, талерантнасцю (вядома, не ідэальнай) і разнастайнасцю", - гаворыцца ў артыкуле. На думку аўтара, Украіна больш гасцінная да жыхароў Крыма, чым калі-небудзь зможа быць пуцінская Расея.

"Змякчэнне курсу Украіны - магчыма, адна з прычын, па якой пуцінскія СМІ так энергічна імкнуцца ўваскрасіць савецкую карыкатуру на ўкраінскі нацыяналізм як сінонім нацызму. У адказ лідары ўкраінскай яўрэйскай абшчыны ў чацвер напісалі Пуціну адкрыты ліст, выкрываючы яго "хлусню і паклёп", - гаворыцца ў артыкуле.

Гісторык Стывен Коэн мяркуе, што Украіна - гэта "дзве краіны": прарасейскі ўсход і ўкраіна-нацыяналістычны захад. Камінскі пярэчыць: "дзве краіны" - гэта "карумпаваныя інсайдэры" і нацыя "ад Львова да Данецка", якая хоча пакінуць "брудную палітыку" ў мінулым.

У паловы ўкраінцаў ёсць сваякі або сябры ў Расеі. Гэтыя цесныя сувязі тлумачаць, чаму "Крамлю трэба, каб украінскі эксперымент праваліўся", па словах Камінскі.

"Расейскае ўварванне ў Крым агаліла далікатнасць украінскай дзяржавы", - працягвае аўтар. На яго думку, многія палітыкі, якія вырасьлі ў савецкі перыяд, імкнуліся да ўлады, каб красці. Армія прыйшла ў заняпад.

Але сёння ва Украіне "Пуцін змяніў Януковіча ў якасці змрочнай фігуры, якая натхняе праўкраінскія настроі", гаворыцца ў артыкуле. "Гэта больш не барацьба ўкраінцаў за свабоду, - кажа кіраўнік групы тэлекампаній 1+1 Саша Ткачэнка. - Цяпер гэта барацьба украінцаў супраць Пуціна".

"Як і Еўропа, да якой яна хоча далучыцца, новая Украіна амаль не мае жорсткай сілы для прымянення супраць Крамля. Але моц яе прыкладу - пагроза, з якой Расея змагаецца, блакуючы сайты з незалежнымі навінамі з Украіны", - гаворыцца ў артыкуле.

Пуцін ваюе не з тым, што ўяўляе сабой Украіна сёння, а з тым, чым яна можа стаць, заключае аўтар.