Рэспубліканскіх «Дажынак» больш не будзе

Рэспубліканскі фестываль-кірмаш работнікаў вёскі «Дажынкі» зменіць фармат.

Такое рашэнне прынята 10 сакавіка падчас дакладу Лукашэнкі ў гэтым пытанні, паведамляе яго прэс-служба.

Лукашэнка звярнуў увагу на тое, што «Дажынкі» з'яўляюцца карысным для краіны святам, паколькі за час іх правядзення былі прыведзены ў парадак як буйныя, так і невялікія гарады.

«Там, дзе прайшлі кірмашы, пасля гэтага заставаўся добры след для народа. У гэтым каштоўнасць гэтага фестывалю. Але будзем шчырыя, што ёсць і пэўныя недахопы ў гэтым працэсе ў той форме і ў тым выглядзе, у якім мы гэта рабілі», - лічыць ён.

У прыватнасці, Лукашэнка адзначыў, што фестываль задумваўся як падвядзенне вынікаў сельскагаспадарчага года, аднак у пачатку восені, калі праводзіцца свята, яшчэ рана казаць пра вынікі, паколькі нямала сельгаскультур яшчэ застаюцца непрыбранымі, напрыклад цукровыя буракі, кукуруза. «Гэта значыць, мы падводзім вынікі фактычна толькі па збожжавых культурах. Вось у гэтым пэўны недахоп», - заўважыў кіраўнік. Ён падкрэсліў, што за аснову варта браць перш за ўсё не валавыя аб'ёмы, ураджайнасць, аб'ёмы вырабленага, а эфектыўнасць продажаў, атрыманы прыбытак, грошы на рахунках. «А такую інфармацыю мы можам мець толькі па выніках года», - дадаў кіраўнік.

У той жа час ён лічыць, што з боку «губернатараў» намецілася нейкая ўтрыманская пазіцыя ў тым плане, што на месцах за правядзенне «Дажынак» змагаюцца толькі толькі таму, што з рэспубліканскага бюджэту выдзяляюцца сродкі, за якія на іх тэрыторыі прыводзіцца ў парадак пэўны населены пункт. Па словах кіраўніка, добраўпарадкаванне гарадоў - гэта добра, гэта трэба рабіць і захаваць і ў будучыні.

Што тычыцца фармату «Дажынак», то прынята рашэнне праводзіць іх у раёнах на базе аднаго з аграгарадкоў. На думку кіраўніка, такім чынам за 10-12 гадоў яны будуць прыведзеныя ў поўны парадак.

«Гэта значыць, мы дамо новае дыханне аграгарадкам. І зможам скончыць тую праграму, якую мы перад сабой паставілі», - сказаў ён.

На абласным узроўні «Дажынкі» будуць праводзіцца ў раённых цэнтрах, за выключэннем гарадоў абласнога падпарадкавання і тых, дзе ўжо праходзіў фестываль-кірмаш, што таксама дасць магчымасць належным чынам іх добраўпарадкаваць.