Бжэзінскі: Расеяй кіруе ірацыянальны лідар з маніяй велічы

Калі Пуцін забярэ Крым, ён страціць Украіну, лічыць амерыканскі палітолаг.

Пуцін кажа свету: "Украіна - мая". Як на гэта адказаць? - з гэтым пытаннем карэспандэнт Le Figaro у Вашынгтоне Лора Мандэвіль звярнулася да палітолага Збігнева Бжазінскага.

- Трэба адказаць, што Украіна належыць украінцам. Ва ўсіх краінах маюцца меншасці, у якіх ёсць сваё меркаванне, але мне здаецца відавочным, што большасць украінцаў хоча жыць у незалежнай дзяржаве. Пуцін пагражае гэтай незалежнасці.

- Што ж у такім выпадку рабіць Захаду?

- Перш за ўсё, даведацца, што можа зрабіць сама Украіна. Я не думаю, што хто б там ні было абавязаны абараняць незалежнасць краіны, калі гэтая краіна не гатовая абараняць яе сама. Асабіста я мяркую, што Украіна акажа супраціў, калі Пуцін выкарыстае сілу, як ён ужо зрабіў у Крыме і адкрыта плануе працягваць. Калі ён пяройдзе да дзеянняў, а Украіна пачне супраціў, то цалкам ясна, што Захад павінен будзе неяк дапамагчы ўкраінцам.

- Ці страчаны Крым для Украіны?

- Я не ведаю, але да гэтага пытання варта вярнуцца, калі адносіны паміж Украінай і Расеяй зноў стануць хоць у пэўнай ступені рацыянальнымі і стабільнымі. Рускія прыўнеслі ў гэтыя адносіны ірацыянальнасць і гарачыню, яны правялі бандыцкую атаку на Крым, замаскіраваўшы яе, як гэта зрабіла б мафія. Але ім варта асцерагчыся ўжываць такі падыход да ўсёй Украіны - гэта прывядзе да куды больш магутнага выбуху ў сэрцы Еўропы, да канфлікту, якіх свет не бачыў з 1939 года.

Вялікая рызыка заключаецца ў тым, што Расеяй кіруе ірацыянальны лідар з маніяй велічы. Гэта хвалюе шмат каго з расейцаў. Выкажам здагадку, што Пуціну атрымаецца назаўжды аддзяліць Крым ад Украіны: ён атрымае Крым, але страціць Украіну на многія дзесяцігоддзі, таму што выкліча магутную нацыяналістычную рэакцыю супраць Масквы! Украінцы вызначаюць сваю ідэнтычнасць праз сваю зямлю. Пуцін здзяйсняе жахлівую памылку.

Не згодны з тым, што Еўропа сама справакавала крызіс ва Украіне, атачыўшы Расею і падсунуўшы свае альянсы ўшчыльную да яе межаў. Наадварот, я думаю, што калі б мы не праводзілі пашырэнне НАТА, то сёння сталі б сведкамі канфлікту паміж краінамі Балтыі і Расеі з-за рускамоўнага насельніцтва, канфлікту з Малдовай з-за Прыднястроўя і яшчэ аднаго канфлікту паміж Расеяй і Польшчай.

Мяркую, тэарэтычна можна ўявіць варыянт стабілізацыі Украіны сумесна з Расеяй. Але, паўтаруся, мы маем справу з лідарам, які не можа рацыянальна пралічыць, што будзе карысна для Расеі. Ён аддае перавагу заклікаць да прымітыўнага нацыяналізму і абапіраецца на моладзь са звычкамі хуліганаў, якая збівае ўсіх, хто з ёй не згодны. Паўтараю яшчэ раз: мы павінны быць адзіныя ў сваім адказе.

Пераклад: Inopressa.ru