Затрыманы ў Данецку расеец рыхтаваў выбухі

Грамадзянін Расеі падазраецца ў падрыхтоўцы да выбухаў у стратэгічных адміністрацыйных будынках і грамадскіх месцах Данецка і Луганска.

Пра гэта на брыфінгу паведаміў кіраўнік Службы бяспекі Украіны Валянцін Налівайчанка, перадае ЛІГАБізнесІнформ.

Зараз следства збірае доказы і шукае адказ на пытанне, якая спецслужба Расейскай Федэрацыі стаіць за затрыманым. "Яго бяспека і здароўе знаходзяцца ў нашай адказнасці", - сказаў ён. Падрабязнасці затрымання паведамілі журналістам прадстаўнікі прэс-службы СБУ.

Па папярэдніх дадзеных, затрыманы - ураджэнец Крыма, які пражывае ў Маскве, грамадзянін Расеі, 1977 года нараджэння. Мэтай яго працы нібыта былі выбухі ў грамадскіх месцах, у рамках падрыхтоўкі да гэтай працы і для дэстабілізацыі сітуацыі на ўсходзе Украіны ён збіраў групы ў Луганску і Данецку. У СБУ сцвярджаюць, што ў затрыманага ёсць вопыт працы ў гарачых кропках Расеі, у прыватнасці, у Дагестане, што дае падставы выказаць здагадку, што ён звязаны са спецслужбамі.

Грамадзянін Расеі быў затрыманы Службай бяспекі Украіны сумесна з МУС у ноч на 11 сакавіка непадалёк ад свайго месца пражывання ў Данецку. У яго асабістых рэчах выяўленыя кампаненты для выбухоўкі, у прыватнасці, рэчыва, падобнае на пластыд. Цяпер гэтую версію правярае экспертыза.

Прэс-служба СБУ прадэманстравала журналістам фатаграфіі канфіскаваных кампанентаў выбухоўкі, а таксама аўдыёзапіс размовы затрыманага з куратарам з Расеі. З гэтай размовы вынікае, што ён просіць на падрыхтоўку тыдзень, збірае баявы складнік у Данецку і Луганску і скардзіцца на дрэнную сувязь.

СБУ адкрыла крымінальную вытворчасць па артыкуле 263 КК Украіны (незаконнае абыходжанне са зброяй, баявымі прыпасамі або выбуховымі рэчывамі). Гэта толькі першае абвінавачанне. Па ходзе следства, як кажуць у СБУ, пералік абвінавачванняў можа пашырыцца.