Лукашэнка просіць аддаць яму Украіну

Беларускі кіраўнік гарантуе «стабільнасць ва Украіне ўжо да канца года».

Пра гэта Лукашэнка заявіў у сераду ў Менску на пасяджэнні Савета бяспекі па папярэдніх выніках першага этапу праверкі боегатоўнасці Узброеных сіл Беларусі, піша «Інтэрфакс».

Кіраўнік раіць новай украінскай уладзе больш надаваць увагі вырашэнню ўнутраных праблем у краіне, а не перамоваў з заходнімі партнёрамі.

«У сухім астатку - трэба проста працаваць, трэба менш бегаць па замежжах, а трэба займацца ўласнай краінай і дабрабытам уласнага народа», - заявіў ён.

«Як гэта зрабіць, калі трэба, мы падкажам і дапаможам», - сказаў ён, звяртаючыся да новых украінскіх уладаў.

Лукашэнка адзначыў, што ў яго часта цікавяцца, што трэба рабіць для пераадолення крызісу на Украіне. «Я жартам адказваю: «Вы не напружвайцеся - проста трэба працаваць. А калі вы не ведаеце, што рабіць, - даручыце нам гэтую краіну, і да канца года мы забяспечым там стабільнасць, адзінства народа і цэласнасць дзяржавы», - сказаў ён.

«Ніякія «крамлі» на мяне не ціснуць»

Лукашэнка заяўляе, што «пры вызначэнні пазіцыі Беларусі па сітуацыі ва Украіне ён зыходзіць з нацыянальных інтарэсаў краіны».

«Па-першае, на мяне ніхто не цісне, ніякія «крамлі» і іншае на мяне ніколі не ціснулі», - заявіў ён.

Такім чынам ён пракаментаваў здагадкі, якія з'явіліся ў СМІ, што «маўляў, Лукашэнка не саступае ціску Крамля (па сітуацыі ва Украіне), пакуль трымаецца і гэтак далей».

Лукашэнка падкрэсліў, што такі ціск «бесперспектыўны або, як кажуць дыпламаты, контрпрадуктыўны».

«На мяне няма чаго ціснуць. Я буду абараняць інтарэсы сваёй краіны і дзейнічаць у строгай адпаведнасці з нашымі дамовамі, у тым ліку і ў адпаведнасці з дамовай аб будаўніцтве Саюзнай дзяржавы, дзе ў нас ёсць прамыя абавязацельствы, таксама, як і ў Расеі», - падкрэсліў ён.

Ён таксама распавёў, што ў апошні час у сувязі з падзеямі ва Украіне знаходзіцца «ў пастаянным кантакце» з прэзідэнтам Расеі Уладзімірам Пуціным. «Няўжо занадта «разумным» прадстаўнікам СМІ незразумела, што мы не можам абыходзіць бокам і гэтае пытанне (сітуацыю ва Украіне). Ён увесь час знаходзіцца ў поле зроку прэзідэнта Расеі і прэзідэнта Беларусі», - заявіў Лукашэнка.

«У Менску Майдана не будзе»

Лукашэнка заяўляе пра адсутнасць у краіне прычын для паўтарэння ўкраінскіх падзей.

«Я ў чарговы раз хачу сказаць, у Менску «майдана» не будзе, тут няма месца для «майдана», - заявіў Лукашэнка.

«Мы нічога не баімся, абсалютна, тым больш я», - падкрэсліў ён. «У нас няма фундаментальных, канцэптуальных прычын для падобных рэвалюцый», - адзначыў ён. «А галоўную прычыну мы ўсе ведаем - гэта страшны развал эканомікі, гэта карупцыя, якая прывяла да развалу ўлады (ва Украіне)», - сказаў Лукашэнка. «Мы гэтага не дапусцілі, і гэта вельмі вялікая наша заваёва, прабачце за нясціпласць», - працягнуў Лукашэнка.

У той жа час кіраўнік заўважыў, што «дурным быў бы той кіраўнік, які не спрабуе атрымаць урокі з некаторых падзей».

Лукашэнка - Захаду: «Нас палохаць не трэба»

Кіраўнік называе «таннымі» прагнозы, якія з'явіліся ў заходніх СМІ, што Расея распачне ў дачыненні да Беларусі дзеянні, аналагічныя палітыцы, якая праводзіцца ва Украіне.

«Калі нас хочуць напалохаць, то гэта вельмі танна. Нас палохаць не трэба», - заявіў ён.

Такім чынам ён пракаментаваў прагнозы заходніх СМІ аб тым, што падзеі ва Украіне павінны стаць перасцярогай для іншых краін, у прыватнасці Арменіі і Беларусі, пра магчымае ўваходжанне ў склад РФ.

«Мы будзем дзейнічаць выключна ў адпаведнасці з нарматыўна-прававой базай, якая ў нас існуе паміж Расеяй і Беларуссю. Я ўжо некалькі разоў гэта ў адкрытую казаў: Мы з расейцамі - адзін народ, роўна як і ўкраінцы, мы славяне і мы заўсёды будзем разам», - сказаў ён.

«Але мы не збіраемся тут мітусіцца, мы не збіраемся быць ініцыятарамі эскалацыі нейкіх працэсаў у сувязі з украінскімі падзеямі і супрацьстаяннем Захаду, ЗША, з аднаго боку, і Расеі - з іншага боку», - адзначыў ён.

«Мы будзем дакладна ахоўваць інтарэсы нашай дзяржавы, нашых сяброў і суседзяў, нашых саюзнікаў. Таму палохаць нас у гэтым дачыненні не варта», - сказаў на заканчэнне Лукашэнка.