У цэнтры Менска адкрываюць чарговае казіно
29- 12.03.2014, 16:16
- 3,810
Яшчэ адно казіно, на гэты раз на вуліцы Якуба Коласа, з'явілася ў Менску.
У будынку, які будаваўся адначасова з Паліграфкамбінатам і размешчаны праз дарогу ад яго, ужо 1 красавіка адкрыецца ўстанова пад назвай «Карат». У калісьці «маналітнай» сцяне будынка з'явіліся два акуратных уваходы і адпаведныя шыльды. Дзякуючы адсутнасці дрэў, што раслі побач ўздоўж дарогі літаральна да кастрычніка мінулага года, установа добра праглядаецца з галоўнага праспекта горада.
30 кастрычніка мінулага года адзін з чытачоў onliner.by пачаў біць трывогу: у самым цэнтры горада, дзе і так не хапае зеляніны, высякаюць дрэвы. Аднак «Зелянбуд» такую вестку ўспрыняў стрымана:
«На гэтым участку праходзіць рэканструкцыя трамвайнага шляху. У цэлым работы будуць весціся досыць шырокія - пачынаючы ад праспекта Машэрава і да вуліцы Калініна. Аб'ект падзелены на некалькі участкаў, існуе ўзгоднены праект, які прадугледжвае высечку дрэў і кампенсацыйныя пасадкі. Менавіта ў гэтым месцы, каля «Імпульсу», па вопыту замежных краін будзе праводзіцца пашырэнне праезнай часткі».
Зрэшты, у агучаную «зелянбудаўцамі» Савецкага раёна прычынна-выніковую сувязь паверылі далёка не ўсе чытачы, выказаўшы свае сумневы ў каментарах: ажыццяўляць пашырэнне дарогі за кошт і без таго вузкага тратуара, ды да таго ж паміж двума пешаходнымі пераходамі як мінімум нерацыянальна. Да гэтага часу работы па рэканструкцыі трамвайнага шляху на паказаным участку так і не пачаліся. Затое аматары правесці час у казіно могуць быць удзячныя службам, якія спілаваді дрэвы: дзякуючы адсутнасці натуральнага «плота» шыльда ўстановы бачная нават з праспекта Незалежнасці, а значыць, не заўважыць з'яўленне новага казіно не атрымаецца.
Як распавялі парталу ў «Караце», адкрыццё ўстановы запланавана на 1 красавіка, увесь персанал ужо набраны. Вырашана і немалаважнае пытанне з аўтатранспартам: у двары дома размешчаная ахаваная паркоўка на 50 машын.