«Ай-яй-яй, Лукашэнка спалохаўся»
76- 13.03.2014, 13:17
- 6,593
Дыктатар паскардзіўся амбасадару Сурыкаву на расейскія СМІ.
Ён абурыўся каментарамі, што Беларусь шукае ваеннай абароны ў Расіі, піша «Інтэрфакс».
«Учора асобныя расейскія каналы паставілі Беларусь у шэраг з Крымам і - ай-яй-яй: Лукашэнка спалохаўся, папрасіў дапамогі, абароны ў Расеі», - заявіў Лукашэнка ў чацвер у Менску на сустрэчы з кіраўніком Мардовіі Уладзімірам Волкавым, на якой, у тым ліку, прысутнічаў амбасадар РФ у Менску Аляксандр Сурыкаў.
«Навошта вы гэта робіце? Вы лепш скажыце, што вы даўно просіце ў нас гэта. І я ўжо тут, ведаеце, рознымі выкрутасамі прапанаваў, каб Расея прыехала і тут прызямлілася», - сказаў Лукашэнка.
«Праўда, мы адрэгулявалі да вечара. Я зноў катэгарычна папярэдзіў: калі вы будзеце так паступаць, мы паступім інакш», - працягнуў ён.
«Нельга так рабіць. Навошта гэта падаваць незразумела як?» - падкрэсліў Лукашэнка. «У нас нармальная абстаноўка. Вы бачыце: ні вайны няма, усё ціха, спакойна», - падкрэсліў ён.
«Калі хтосьці там кідаецца ў Польшчы, ці натаўцы і гэтак далей, - так у нас ёсць план на гэта, мы яго павінны рэалізоўваць», - сказаў Лукашэнка, нагадаўшы пра беларуска-расейскія дамоўленасці ў рамках «саюзнай дзяржавы». «Я прапанаваў Расеі - давайце рэалізоўваць (гэты план)», - сказаў на заканчэнне ён.
У мінулую сераду прайшло пасяджэнне Савета бяспекі Беларусі, дзе, у тым ліку, абмяркоўваўся пачатак другога этапа праверкі боегатоўнасці Узброеных сіл Беларусі, у які былі ўнесеныя змены ў сувязі з сітуацыяй ва Украіне і актывізацыяй сіл НАТА паблізу межаў Беларусі. На пасяджэнні было абвешчана рашэнне запрасіць дадатковыя сілы ВПС РФ да правядзення сумесных вучэнняў. Было падкрэслена, што такія вучэнні рэгламентуюцца двухбаковымі дамоўленасцямі аб стварэнні і функцыянаванні адзінай рэгіянальнай групоўкі войскаў Беларусі і Расеі.