Польскія фермеры заблакавалі дарогу ў Беларусь
14- 14.03.2014, 18:00
- 65,265
Некалькі трактароў блакуюць дарогу на памежным пераходзе ў Тэрэспалі.
Блакада з'яўляецца формай пратэсту, падставай для якога стала абмежаванне продажу свініны з-за двух выпадкаў выяўлення афрыканскай чумы свіней, паведамляе PAP (пераклад - charter97.org).
Дарога перакрытая прыкладна ў 20 кіламетрах ад памежнага пераходу Тэрэспаль-Берасце. У сувязі з гэтым фуры стаяць у корку.
- Пратэстоўцы кожныя 10 хвілін прапускаюць па некалькі грузавікоў, - сказаў прэс-сакратар аддзела паліцыі ў Белай Падлясцы Яраслаў Яніцкі.
Легкавыя аўтамабілі аб'язджаюць блакаду па мясцовых дарогах каля мястэчка Залессе.
Пасля таго, як у лютым у Польшчы былі выяўленыя два выпадкі АЧС у мёртвых кабаноў непадалёк ад мяжы з Беларуссю, попыт на свініну знізіўся, а закупачныя кошты на яе ўпалі нават на некалькі дзясяткаў адсоткаў. Акрамя таго, мяса з буферных зон не можа экспартавацца.
У сувязі з адсутнасцю мер для пераадолення наступстваў эпідэміі міністр сельскай гаспадаркі Польшчы Станіслаў Калемба ўчора падаў у адстаўку.
Фота: PAP/Wojciech Pacewicz