Расейскія вайскоўцы: Пасля «рэферэндуму» пойдзем на штурм
85- 15.03.2014, 10:08
- 85,301
Расейскія вайскоўцы раскрылі таямніцу аб тым, што па-сапраўднаму пачнуць дзейнічаць 17 сакавіка.
Пра гэта яны заявілі ў інтэрв'ю тэлеканалу ТСН.
Разгаварыць акупантаў практычна немагчыма, прыходзіцца маскіравацца пад мясцовых. Акрамя таго, яны аглядаюць усіх, хто набліжаецца да брамы захопленай імі часткі марской пяхоты.
У той жа час, расейцы абяцаюць са сваім прышэсцем райскае жыццё ўсім Крымчанам.
Узброеныя «зялёныя чалавечкі» пацвярджаюць, што яны рускія і ўпэўненыя, што ва Украіне знаходзяцца законна. Большасць з іх кантрактнікі з аформленай камандзіроўкай. Таксама яны кажуць, што прыехалі ва Украіну цалкам свядома.
Акрамя таго, расейцы раскрываюць вайсковую таямніцу і кажуць, што дзейнічаць па-сапраўднаму пачнуць 17 сакавіка.
Менавіта тады, пасля незаконнага «рэферэндуму», заблакаваныя ўкраінскія воінскія часткі будуць разглядацца, як незаконныя бандыцкія фарміраванні і, адпаведна, расейцы пойдуць на штурм.
Мірнае насельніцтва абяцаюць не чапаць: «Мірных жыхароў страляць не будзем. Мірных пастараемся хаваць у дамах або падвалах».
Расейскія захопнікі таксама распавядаюць, што аперацыю ўзяцця Крыму плануюць завяршыць цягам месяца.
Таксама яны папярэджваюць, што ў гэты час на ўсходняй мяжы Украіны таксама нешта будзе адбывацца, паколькі там таксама іх войскі.
Фота: Reuters