ААН: Дзевяць мільёнаў сірыйцаў сталі бежанцамі

Колькасць бежанцаў з Сірыі перавысіла 9 млн чалавек.

Аб гэтым паведамляецца на афіцыйным сайце ўпраўлення Вярхоўнага камісара ААН у справах бежанцаў.

Больш за 2,5 мільёны сірыйцаў атрымалі статус бежанцаў у суседніх краінах або чакаюць атрымання гэтага статусу. Лік часова перамешчаных асоб унутры Сірыі перавысіў 6,5 мільёнаў чалавек. У суме агульная колькасць бежанцаў унутры краіны і за мяжой склала больш за 40 адсоткаў ад насельніцтва краіны да пачатку канфлікту, адзначаецца ў паведамленні, перадае РІА «Новости».

«Гэта неверагодна, што гуманітарная катастрофа такога маштабу разгортваецца на нашых вачах без значнага прагрэсу ў працэсе ўрэгулявання канфлікту. Мы павінны рабіць усё неабходнае для дасягнення міру. Мы павінны рабіць усё, каб палегчыць пакуты нявінных людзей, якія апынуліся ў зоне канфлікту і вымушаных пакінуць свае дамы», - сказаў вярхоўны камісар Антоніа Гутэрас.

Калі падчас мірнага ўрэгулявання не адбудзецца прыкметнага прарыву, то ў бліжэйшай перспектыве колькасць бежанцаў з Сірыі можа толькі вырасці. Так, у суседнім Ліване колькасць зарэгістраваных бежанцаў з Сірыі да канца 2014 года можа вырасці з прыкладна аднаго мільёна чалавек да 1,6 мільёна.

У Сірыі з сакавіка 2011 года працягваецца ўзброены канфлікт, які забраў, паводле звестак ААН, жыцці звыш 100 тысяч чалавек.