Spiegel: Расею могуць выключыць з «Вялікай васьмёркі»

Адмяняецца таксама шэраг расейска-нямецкіх сустрэч.

Вядучыя індустрыяльныя дзяржавы свету, якія аб'яднаны ў «Вялікую сямёрку», рыхтуюцца правесці наступны саміт без Расеі.

Пра гэта паведамляе нямецкае выданне Spiegel-Online.

Паводле інфармацыі выдання, для правядзення наступнай планавай сустрэчы кіраўнікоў дзяржаў і ўрадаў краін «Вялікай сямёркі» шукаюць месца замест Сочы, дзе павінна было адбыцца пасяджэнне.

Выданне мяркуе, што адмова праводзіць саміт у чэрвені ў Сочы, сведчыць, што Расея можа страціць статус члена G-8. Таксама паведамляецца, што ў цяперашні час правяраецца магчымасць правядзення запланаваных на красавік расейска-нямецкіх урадавых кансультацый.

Spiegel-Online са спасылкай на крыніцы ва ўрадзе ФРГ адзначае, што альтэрнатыўнае месца сустрэчы ў чэрвені прапанаваў брытанскі ўрад. У іншых удзельнікаў G7 пярэчанняў з нагоды Лондана не ўзнікла.

Калі ж прэзідэнт Расеі Уладзімір Пуцін не зменіць сваю пазіцыю адносна Крыму, Берлін адмовіцца таксама і ад правядзення запланаваных на красавік нямецка-расейскіх урадавых кансультацый у Лейпцыгу, гаворыцца ў паведамленні Spiegel-Online.

У крайнім выпадку гаворка можа ісці аб «невялікім халодным фармаце. Пры такіх абставінах нішто іншае не мае сэнсу», - заявілі ў нямецкім урадзе.

Фото: Matt Cardy/Getty Images