Сярод скарбаў Януковіча знайшлі крадзеныя карціны Пікасо і Шышкіна
16- 17.03.2014, 9:14
- 33,824
Эксперты ацанілі прыкладны кошт вывезеных твораў мастацтва Межыгор'я.
Усё лепшае, што Януковіч пакінуў пасля сябе ў былой рэзідэнцыі, на наступным тыдні пакажуць у Нацыянальным мастацкім музеі Украіны. Гэта, вядома, невялікая - і далёка не самая каштоўная частка яго хатняй калекцыі. Хоць нават у ёй ёсць карціна, коштам у 6 мільёнаў даляраў.
Як гаворыцца ў сюжэце ТСН, на мінулым тыдні ў інтэрнэце з'явілася ўнікальнае відэа з камер назірання: як у Межыгор'і пакавалі цэлыя грузавікі з карцінамі, абразамі і антыкварыятам.
Падчас другога прышэсця для прэсы Януковіча ў Растове, былы прэзідэнт Украіны ў чарговы раз адхрысціўся ад статусу ўцекача. «Паўтараю - я нікуды не ўцякаў», - падкрэсліў тады экс-прэзідэнт. Было гэта ў аўторак, а ўжо ў сераду ў сетцы з'явілася відэа, як менавіта ён «не ўцякаў».
Тое, што ці то нажыта, ці то нарабавана непасільнай прэзідэнцкай працай, вывозілі з Межыгор'я 4 дні - з 19 па 22 лютага. Як вядома, на Майдане ў гэты час забівалі людзей, Януковіч на паперах мірыўся з апазіцыяй, а ў Межыгор'і пакавалі валізкі і грузілі цэлыя грузавікі - тавару ў экс-прэзідэнта было як у Плюшкіна, вось толькі значна даражэй. Карціны, абразы, зброя, вазы, статуэткі, на некаторых кадрах з камер назірання гэта дабро можна добра разглядзець. Іх кошт паспрабавалі ацаніць разам са спецыялістамі і журналісты.
Экспертамі выступілі адзін з самых вядомых ва Украіне мастацтвазнаўцаў, куратар прыватных калекцый Эдуард Аляксандравіч Дымшыц і вядомы антыквар, дырэктар аўкцыённага і антыкварнага дома Леанід Маркавіч Комскі. Яны папрасілі не ўспрымаць іх словы як ісціну ў апошняй інстанцыі і распавялі шмат цікавага. Напрыклад, што аўтарам аднаго з лясных пейзажаў, па адной з версій, з'яўляецца сам Іван Шышкін, а кошт такой працы стартуе ад мільёна даляраў ЗША.
Пра тое, што ў калекцыі Януковіча магла быць такая дарагая карціна, ужо можна казаць дакладна, так як цяпер у нацыянальным мастацкім музеі вісіць палатно Васіля Паленава «Хрыстос і грэшніца» - яго забыліся ў Межыгор'і, коштам прыкладна 4 мільёны фунтаў стэрлінгаў.
