Тарас Беразавец: Фірташ здаў агентуру Крамля ва Украіне

Арышт украінскага алігарха Дзмітрыя Фірташа ў Аўстрыі наўпрост звязаны з агрэсіяй Расеі ва Украіне.

Такое меркаванне ў каментары для Gordonua.com выказаў вядомы ўкраінскі палітолаг Тарас Беразавец.

"Арышт Фірташа пераследуе некалькі мэтаў. Амерыканцы паказваюць Пуціну, што такі ж лёс можа чакаць любога з расейскіх алігархаў. Таму што ўсіх іх можна перамагчы. Іх сем'і жывуць на Захадзе. Пачынаючы ад Абрамовіча і Дзерыпаскі. А кожны з іх можа быць абвінавачаны па любых эпізодах. Расейскім бізнесменам даюць сігнал - спыняйце падтрымліваць Пуціна, а украінскім - хопіць гуляць у сепаратызм", - лічыць эксперт.

Пры гэтым палітолаг упэўнены, што алігарха адпусцілі пад заклад за тое, што ён здаў усю патрэбную ФБР інфармацыю.

"Тое, што Фірташа адпусцілі пад заклад, азначае адно - ён здаў агенту ФБР, які працаваў з ім у Аўстрыі, усю інфармацыю пра бізнес-праекты Пуціна, пра крамлёўскую агентуру сярод украінскага палітычнага істэблішменту. Гэтыя прозвішчы на самой справе былі і так вядомыя, але ўсім патрэбная доказная база", - заявіў Беразавец.

"Амерыканцы паказваюць, што недатыкальных у гэтым свеце няма", - упэўнены эксперт.

На думку палітолага, канфліктам у Крыме Пуцін сам сябе загнаў у пастку.

"Па сутнасці, Амерыка выйграла вайну з Расеяй. Яны ўцягнулі расейцаў у гэты ўкраінскі канфлікт. Расея пасварылася з усім светам, уключаючы сваіх бліжэйшых саюзнікаў, і сёння Пуцін загнаў сам сябе ў пастку. Ён і з Крыма выйсці не можа, каб не страціць твар, але чым даўжэй ён там будзе заставацца, тым большымі будуць страты яго атачэння", - адзначыў Беразавец.

"Асяроддзе расейскага прэзідэнта сёння напалохана. Яны не разумеюць, што адбываецца, але ва ўсіх шок. Там ёсць невялікая група ястрабаў, а ўсе астатнія проста напалоханыя, таму што разумеюць, што Захад дабярэцца да ўсіх, калі яму будзе трэба. Актывы арыштуюць, а у горшым выпадку, як робяць сёння з уласнасцю Януковіча, калі знаходзяць актывы, іх вяртаюць ва Украіну, у дзяржаўны бюджэт", - упэўнены аналітык.

Беразавец не ўпэўнены, што Пуцін гатовы далучаць усходнія вобласці па "крымскім сцэнары".

"Ва ўсходняй Украіне будзе абвастрэнне сітуацыі, гэта ўжо зразумела. Толькі невядома, ці гатовы Пуцін павышаць стаўкі. Адна справа ўчыняць правакацыі і тэракты, а іншая справа - спрабаваць правесці па крымскім сцэнары змяненне дзяржаўнай улады, пераварот і прывядзенне гэтых "конікаў" (салдат расейскай арміі)", - адзначыў аналітык.

На думку эксперта, санкцыі Захаду змогуць стрымаць Пуціна.

"Пагроза інтэрвенцыі існуе, але яна не занадта вялікая. Усё ж такі Пуціна будуць стрымліваць магчымыя санкцыі, таму што яны пагоршаць яго сітуацыю. Сёння ўвядзенне санкцый супраць Расеі стрымлівае толькі адна краіна - Францыя. Ужо нават Германія пагадзілася заняць жорсткую пазіцыю, хоць гэта былі іх бліжэйшыя саюзнікі. А акупацыя ўсходняй Украіны не пакіне Еўропе выбару, і тады будуць уведзеныя вельмі жорсткія санкцыі", - заявіў Беразавец.