Хакеры вывелі з ладу сайт і банкаматы «Альфа-банка»
6- 17.03.2014, 12:00
- 14,374
Расейскі «Альфа-банк» абвясціў аб тэхнічных праблемах у працы сваіх сістэм.
Сайт крэдытнай арганізацыі таксама выйшаў з ладу, а таму паведамленне аб збоі з'явілася ў афіцыйным «Твітэры» «Альфа-банка», перадае РБК.
«Паважаныя кліенты! На дадзены момант назіраюцца тэхнічныя праблемы ў працы сістэм банка. Будзем трымаць вас у курсе», - адзначаецца ў паведамленні.
Больш падрабязнае паведамленне аб узніклых праблемах з'явілася на афіцыйнай старонцы банка ў сацыяльнай сетцы «Фэйсбук».
«У дадзены момант назіраецца недаступнасць інтэрнэт-рэсурсаў банка, а таксама часткі банкаматнай сеткі з-за праблем на баку правайдэра. Наколькі нам вядома, праблемы закранулі не толькі нас», - гаворыцца ў паведамленні.
У банку запэўнілі, што яго тэхнічныя службы сумесна з правайдэрам прыкладваюць «усе намаганні для выпраўлення сітуацыі ў самыя кароткія тэрміны».
Адказнасць за абвал сайта ўзяла на сябе група хакераў Anonymous Caucasus, якая на мінулым тыдні атакавала сайт «Первого канала».
«Альфа-банк і Анлайн-банкінг намі выведзеныя з ладу», - паведамляецца ў афіцыйным твітэры групы хакераў. У англамоўным паведамленні той жа групы дададзеная таксама «Expect us Russia».
Раней украінскія хакеры абрынулі сайт «Российской газеты». Прадстаўнікі выдання паведамілі, што рэсурс быў атакаваны актывістамі «Кіберсотні» - аб'яднання ўкраінскіх апазіцыянераў, якія актыўна дзейнічаюць у інтэрнэце.
У пачатку сакавіка ахвярай хакераў стаў сайт тэлеканала Russia Today. Хакеры ўзламалі партал і дадалі слова Nazi (нацыст, нацысцкі) да загалоўкаў усіх артыкулаў на англійскай мове.