Расея гатовая афіцыйна акупаваць Крым за два тыдні

У партыі ўлады «Адзіная Расея» заявілі, што Крым анэксуюць «у кароткія тэрміны».

Пра гэта УНІАН паведамілі ў партыі ўлады «Адзіная Расея» са спасылкай на дэпутата Вячаслава Ніканава. На яго думку, працэс далучэння Крыма да Расеі пройдзе ў кароткія тэрміны, гэта «можна ажыццявіць за тыдзень-два». «Наколькі хутка можа быць ажыццёўлены працэс далучэння - я думаю, ён будзе ажыццёўлены досыць хутка», - сказаў Ніканаў.

На яго думку, Крым - «незалежная дзяржава цяпер дэ-факта, і Расея можа прызнаць Крым не як частку Украіны, а як незалежную дзяржаву». «У гэтым выпадку, вядома, ніякай згоды ад цэнтральнага ўрада кіеўскага не патрабуецца», - сказаў расейскі парламентар.

Акрамя таго, віцэ-спікер Дзярждумы РФ Сяргей Нявераў заявіў, што «ўсе неабходныя заканадаўчыя рашэнні па выніках праведзенага рэферэндуму будуць прынятыя ў самыя кароткія тэрміны».

«Гэта (рэферэндум) адказ усім тым, хто ў гэтыя дні спрабаваў перашкодзіць жыхарам Крыма самім вызначаць свой лёс, сваю будучыню і будучыню сваіх дзяцей. І гэта будучыня ў нас агульная - у краіне, дзе выконваюцца законы, дзе абароненыя правы і свабоды грамадзян, дзе моцны лідар, прынцыповая пазіцыя якога дазволіла аднавіць гістарычную справядлівасць», - лічыць Нявераў.

Нагадаем, 16 сакавіка ў Крыме прайшоў «рэферэндум» аб статусе аўтаноміі. Па выніках апрацоўкі бюлетэняў за далучэнне паўвострава да РФ прагаласавалі 97% крымчан.

Фота: Reuters