Рада разгледзіць разрыў дыпламатычных адносінаў з Расеяй

У Вярхоўную Раду Украіны ўнесены законапраект, які прадугледжвае разрыў дыпламатычных адносінаў з Расеяй.

Яго тэкст апублікаваны на сайце парламента. Аўтарам з'яўляецца дэпутат, лідар Радыкальнай партыі Алег Ляшко.

У законапраекце ідзе гаворка пра «першачарговыя меры ў сувязі з ваеннай агрэсіяй». Разам з разрывам адносінаў Ляшко таксама заклікае разарваць пагадненні аб знаходжанні Чарнаморскага флоту на тэрыторыі Украіны і дамову аб дружбе і супрацоўніцтве паміж Украінай і Расеяй. Акрамя таго, ён прапануе ўстанавіць кошт транзіту расейскага газу па ўкраінскай тэрыторыі ў 500 даляраў за тысячу кубаметраў (па дадзеных на люты, якія прыводзіў «Інтэрфакс-Украіна», стаўка платы за транзіт складала 2,73 даляра за прапампоўку тысячы кубаметраў газу на сто кіламетраў).

Акрамя гэтага ў законапраекце прапануецца прызнаць украінцаў, якія ладзяць мітынгі за далучэнне да РФ, «памагатымі акупантаў», пазбаўляць іх украінскага грамадзянства і прыцягваць да адказнасці за дзяржаўную здраду. Нарэшце, Ляшко заклікае «на час ваеннай агрэсіі ўвесці смяротнае пакаранне для здраднікаў, дыверсантаў, марадзёраў, забойцаў, дэзерціраў і шпіёнаў».

Нагадаем, што 17 сакавіка Вярхоўная Рада абвясціла аб частковай мабілізацыі на Украіне. Паведамлялася, што ва Узброеныя сілы краіны плануецца прыцягнуць 20 тысяч чалавек, яшчэ 20 тысяч - у нядаўна створаную Нацыянальную гвардыю. Рашэнне аб мабілізацыі тлумачылася абвастрэннем абстаноўкі ў Крыме.