Беларускі тураператар: Сезон у Крыме скончыўся, не пачаўшыся

Сітуацыя вакол Крыму сур'ёзна б'е па турбізнэсе.

Беларусы адмаўляюцца ад сваіх тураў або мяняюць іх на Прыбалтыку і Балгарыю. І, як адзначаюць многія тураператары, у гэтым сезоне сітуацыя ўжо наўрад ці палепшыцца. Пра тое, чаго чакаць беларускаму бізнэсу, які працуе ў Крыме, «Інтэрфакс-Захад» пагаварыў з беларусам Сяргеем, у якога ёсць невялікі гатэль на ўзбярэжжы Чорнага мора.

Сезон скончыўся, не пачаўшыся

Мужчына валодае турфірмай і ўжо шэсць гадоў кожны сезон возіць турыстаў у Крым - ад Феадосіі да Еўпаторыі ды іншыя гарады на ўзбярэжжы. І калі год ад года, са слоў прадпрымальніка, колькасць турыстаў стала расла, то ў 2014-м турыстычны сезон у Крыме скончыўся, так і не пачаўшыся.

«Крым, як мы для сябе пастанавілі, на гэты год для нас проста памёр. Таму што людзі проста баяцца і ня хочуць ехаць туды адпачываць. І гэта зразумела, - распавядае Сяргей. - Цяпер ужо сярэдзіна сакавіка. У мінулым годзе ў гэты час туры ў Крым ўжо прадаваліся з раннім рэзэрваваннем і людзі напоўніцу іх куплялі. Цяпер цішыня поўная. Нашы партнёры, да якіх мы вазілі людзей, у шоку і не ведаюць, што цяпер рабіць».

Са слоў прадпрымальніка, ні на травень, ні на лета ніхто не рэзервуе месца на адпачынак. Да таго ж, гэта тычыцца не толькі Віцебска, адкуль Сяргей возіць турыстаў, але і іншых гарадоў.

«Магу сказаць пра нашых агентаў: і ў Віцебску, і ў Полацку, і ў Оршы зусім ціха. Людзі нават не цікавяцца ні коштамі, ні турамі - поўная цішыня. Перавознікі, з якім мы працуем, таксама сядзяць і не ведаюць, што рабіць, - кажа прыватнік. - Мы наважылі шукаць іншыя кірункі: можа быць, Прыбалтыка або Краснадарскі край. Крым для нас пакуль закрыты. Больш за тое, цяпер без працы сядзяць і мясцовыя, крымскія бізнэсоўцы, якія займаюцца турызмам. Людзі, вядома, знаходзяцца ў шоку. Бо на ўсім узбярэжжы турызм - гэта адзіная крыніца даходу. І сезон у Крыме - гэта ліпень і жнівень, і гэтыя два месяцы кормяць ўвесь астатні год. Ніякай прамысловасці або іншага бізнэсу там фактычна няма».

Дарэчы, прадпрымальнік упэўнены, што нават калі б знайшліся ахвотныя адпачыць у Крыме, то ён наўрад ці б сам захацеў іх туды везці.

«Мала таго, што людзі баяцца, нам не вельмі хацелася б нават везці тых, хто захоча, пры той сітуацыі, якая цяпер у Крыме. Калі што-небудзь здарыцца, адказваць за людзей давядзецца нам», - кажа Сяргей.

Крым у складзе Расеі для беларускага бізнэсу стане праблемай

Са слоў прыватніка, калі Крым застанецца ў складзе Украіны, то турызм паволі адновіцца. А калі ж пяройдзе Расеі, то для беларускага турбізнэсу гэта стане сур'ёзнай праблемай.

«Рэч у тым, што асноўная турыстычная плынь з Беларусі ў Крым - гэта аўтобусны турызм. Напрыклад, з Віцебска аўтобус туды ідзе 24 гадзіны, з Гомеля - крыху менш, а летам, улічваючы вялікую плынь турыстаў, на мяжы аўтобусы стаяць па тры-чатыры гадзіны. І гэта ж калі была адная мяжа. А цяпер нам давядзецца перасякаць беларуска-ўкраінскую, а потым украінска-расейскую мяжу. Плюс, напэўна, калі там будзе сапраўдная мяжа, украінцы не будуць радыя і, вядома, зробяць усё, каб людзі днямі стаялі ў чэргах і наогул не ездзілі ў Крым», - мяркуе Сяргей.

«Зразумела, што па Крыме гэта ўдарыць вельмі моцна. Тое, што расейцы туды паедуць адпачываць, наогул нават у перспектыве складана ўявіць. Бо ім таксама давядзецца перасякаць дзве мяжы, а з боку Краснадарскага краю няма моста, і калі ён там будзе невядома. Ды і калі будзе, навошта расейскаму турысту праязджаць Сочы, якія цяпер адбудавалі і ў іх ўкладзеныя мільярды, дзе ўсё новае, і ехаць па дрэнных дарогах лішнія 300-400 кіламетраў, няма сэнсу, - кажа прадпрымальнік. - Да таго ж, асноўная маса турыстаў у Крыму - гэта, у першую чаргу, украінцы, якія проста стануць ездзіць на іншае ўзбярэжжа: у Адэскую, Мікалаеўскую, Херсонскую вобласці - Крымам бо мора не сканчаецца. Ёсць яшчэ Азоўскае мора, урэшце».