126 дамоў у Слоніме засталіся без цяпла з-за абрушэння трубы кацельні

Адзін чалавек дастаўлены ў бальніцу з цяжкімі траўмамі.

Пра гэта паведамляе прэс-служба МНС.

«17.03.2014 года ў 21:26 у цэнтр аператыўнага кіравання Слонімскага падраздзялення МНС ад старэйшага кантралёра ведамаснай вартавой аховы паступіла паведамленне пра абрушэнне трубы на будынак кацельні на тэрыторыі адкрытага акцыянернага таварыства«Слонімская камвольна-прадзільная фабрыка», - гаворыцца ў паведамленні.

Адбылося частковае абвальванне трубы на будынак кацельні. У выніку абвальвання з траўмамі рознай ступені цяжкасці ў бальніцу дастаўлены слесар па рамонце газавага абсталявання, які ў момант здарэння знаходзіўся ў пункце кіравання будынка кацельні. З ім на змене знаходзіліся яшчэ тры чалавекі, якія не пацярпелі.

У выніку частковага абвалу трубы пашкоджаныя канструкцыі будынка кацельні на плошчы 80 кв. метраў, два вадагрэйных катла маркі ПТВМ-30М. Усяго ў кацельні пяць катлоў, з якіх тры паравых і два вадагрэйных катла. Асноўны від паліва - прыродны газ, мазут выкарыстоўваецца ў якасці рэзервовага паліва. Пасля абвалу спрацавала аварыйная аўтаматыка, якая адключыла падачу газу да катлоў, узгарання не адбылося. Аўтаматыка перакрыла доступ газу толькі ў будынак кацельні.

Без цеплазабеспячэння з-за адключэння кацельні засталіся само прадпрыемства, 126 шматкватэрных жылых дамоў, 6 інтэрнатаў, 3 сярэдніх школы, 7 дзіцячых садкоў і 1 сацыяльны прытулак. У сацыяльным прытулку знаходзяцца 10 дзяцей, у дзіцячым садзе з начным знаходжаннем 4 дзіцяці, у выпадку паніжэння тэмпературы дзеці будуць пераведзеныя ў бліжэйшыя дзіцячыя дашкольныя ўстановы.

На месцы здарэння працуюць раённая камісія па НЗ і аператыўныя групы. Прычына высвятляецца.