Расея пагражае захапіць 20 караблёў ВМС Украіны

Чарнаморскі флот Расеі можа папоўніцца прыкладна 20 баявымі караблямі забеспячэння Ваенна-марскіх сіл Украіны.

Калі Крым увойдзе ў склад РФ, то тыя караблі, суда і катэры, якія не пакінулі тэрыторыю рэгіёну, стануць расейскімі, заявіў старшыня камітэта Дзярждумы па абароне, былы камандуючы Чарнаморскім флотам адмірал Уладзімір Камаедаў у інтэрв'ю РІА "Новости". Гэта закране нават адзіную ў арсенале Украіны падлодку "Запарожжа", якая знаходзіцца на крымскай тэрыторыі.

Раней у баявы склад ВМСУ ўваходзіла каля 40 баявых караблёў, судоў і катэраў. Да цяперашняга часу палова з іх стаіць у Севастопалі і Данузлаве. "Пасля падвядзення вынікаў рэферэндуму можна казаць пра тое, што тыя караблі і суды, якія цяпер знаходзяцца ў Крыме, а гэта прыкладна палова карабельнага складу ВМСУ, фармальна ўвойдуць спачатку ў марскія сілы самаабароны Крыма, а затым у баявы склад Чарнаморскага флоту Расеі", - сказаў РІА "Новости" у аўторак Камаедаў. У прыватнасці, расейскімі могуць стаць карветы "Луцк" і "Цярнопаль" і карабель кіравання "Славуціч", піша РБК.

Дзяржаўны савет Крыма прыняў рашэнне аб перадачы ва ўласнасць новаабвешчанай дзяржавы марскіх партоў паўвострава, якія раней кантраляваліся Міністэрствам інфраструктуры Украіны. Адпаведная пастанова прынятая сёння на пазачарговым пленарным пасяджэнні парламента. У спіс нацыяналізаваных аб'ектаў увайшлі Керчанская паромная пераправа, Керчанскі марскі гандлёвы порт, Керчанскі марскі рыбны порт, Феадасійскі марскі гандлёвы порт, Ялцінскі марскі гандлёвы порт, Севастопальскі марскі гандлёвы порт, Севастопальскі марскі рыбны порт, Еўпатарыйскі марскі гандлёвы порт.

Рэспубліцы адышла маёмасць дзяржаўнага прадпрыемства "Адміністрацыя марскіх партоў Украіны" і дзяржаўнай установы "Дзяржгідраграфія". Органам кіравання нацыяналізаванымі аб'ектамі вызначаныя Рэспубліканскі камітэт Крыма па транспарце і сувязі.

Акрамя таго, парламент Крыма абвясціў усе размешчаныя на тэрыторыі паўвострава актывы ўкраінскіх дзяржкампаній "Чарнаморнафтагаз" і "Укртрансгаз" уласнасцю новаабвешчанай дзяржавы.