МЗС Украіны: Пуцін паказаў, наколькі рэальная пагроза свету з боку Расеі
3- 18.03.2014, 16:37
- 13,025
Падпісанне пагаднення аб далучэнні Крыма да РФ не мае нічога агульнага ні з правам, ні з дэмакратыяй, ні са здаровым сэнсам.
Пра гэта заявіў кіраўнік інфармацыйнага дэпартамента МЗС Украіны Яўген Перабійніс, паведамляе прэс-служба ведамства.
"Сёння выступленне Пуціна прадэманстравала наколькі рэальная пагроза РФ для цывілізаванага свету, міжнароднай бяспекі", - заявіў ён.
Міністэрства замежных спраў Украіны звярнулася да ўсіх адказных дзяржаў і міжнародных арганізацый з настойлівым заклікам прыняць дзейсныя меры супраць агрэсара.
"Мы заклікаем увесь свет улічыць урокі гісторыі, якія сведчаць пра тое, што менавіта з патураннем такіх дзеянняў агрэсара, якім сёння адкрыта выступае РФ, пачыналіся глабальныя канфлікты", - падкрэсліў Перабійніс.
Нагадаем, сёння ў Маскве прэзідэнт Расеі Уладзімір Пуцін і самаабвешчаныя прадстаўнікі крымскіх уладаў - «кіраўнік урада» Сяргей Аксёнаў, спікер распушчанага Вярхоўнай Радай крымскага парламента Уладзімір Канстанцінаў і «мэр» Севастопаля Аляксей Чалы 18 сакавіка падпісалі дамову аб уключэнні Крыма і Севастопаля ў склад Расеі ў якасці новых суб'ектаў.