Мабілізацыя ва Украіне: добраахвотнікі сталі ў чэргі каля ваенкаматаў

З пачатку абвяшчэння мабілізацыі ў Нацыянальную гвардыю запісаліся больш за 4000 чалавек.

Пра гэта на сваёй старонцы ў сацыяльнай сетцы «Фэйсбук» паведаміў міністр унутраных спраў краіны Арсэн Авакаў. Украінскія СМІ публікуюць рэпартажы пра чэргі ў ваенкаматах, піша NEWSru.ua.

Міністр расказаў пра наведванне навучальнага цэнтра Нацгвардыі ў сяле Новыя Пятроўцы непадалёк ад Кіева. Там, як раней паведамлялася, ужо трэніруюцца 500 добраахвотнікаў з ліку былых байцоў Самаабароны Майдана.

«Заходзіў у намёты. Трохі няўтульна было на фоне сённяшняга пахаладання, але як запэўнілі хлопцы - на Майдане і не такое цярпелі. Паціху наладжваецца і побыт і адносіны з інструктарамі і байцамі рэгулярных частак Нацгвардыі. Спецыяльна пытаўся ў многіх хлопцаў пра гэта. Нармальна, усе кажуць - размаўляем, абмяркоўваем, адчужэнне растае. Усе разумеюць - былы рэжым нас сутыкаў, а на самой справе нас нішто не падзяляе - у нас адна краіна, і адны мэты - жыць годна ў шчаслівай краіне», - напісаў міністр.

У рэпартажы ТСН сцвярджаецца, што чэргі з добраахвотнікаў у ваенкаматах не змяншаюцца ўжо два тыдні, з таго часу, як у Крым «зайшлі чужыя войскі», прычым ваяваць рвуцца як мужчыны, так і жанчыны. «Дзякуй спадару Пуціну за тое, што згуртаваў нас! Ён яшчэ не ведае, з кім звязаўся», - кажуць навабранцы.

У Палтаўскай вобласці запісвацца ў войска прыйшлі, у асноўным, дарослыя мужчыны, з тых, хто служыў яшчэ пры Савецкім Саюзе, а затым прысягаў на вернасць Украіне. Сайт «Гребенка» паведамляе, што ўзроставыя добраахвотнікі сталі ў чаргу, каб «на вайну першымі не пайшлі дзеці». «Такая сітуацыя склалася, што далей няма куды адступаць. Служыў ужо даўно. Калі снайперы расстрэльвалі людзей, быў на Майдане», - кажа Аляксандр Лысенка.

Украінскі поп-рок гурт СКАЙ запісаў кліп «Ми - разом! Мы - вместе!» у падтрымку адзінай і непадзельнай Украіны. У аснову кліпа ляглі запісы, дасланыя ўдзельнікамі флэш-мобу. Жадаючыя здымалі відэа з плакатам «Ми - разом! Мы - вместе!» на фоне назваў гарадоў або вядомай мясцовасці.

«Якімі б рознымі мы ні былі, мы заўсёды можам знайсці паразуменне і згуртавацца вакол пабудовы шчаслівай і багатай краіны. Усе гэтыя праблемныя пытанні, якімі нас хочуць перасварыць, надуманыя. Мы заўсёды выдатна адзін аднаго зразумеем, было б жаданне», - напісаў лідар гурта Алег Сабчук у сацыяльнай сетцы «Фэйсбук».

Тым часам Gazeta.ua са спасылкай на кіраўніка Цэнтра ваенна-палітычных даследаванняў і прадстаўніка «Інфармацыйнага супраціву» Дзмітрыя Тымчука паведаміла аб перакідцы з тэрыторыі Расеі ў Крым «звышмагутнай зброі чацвёртага пакалення» - дзвюх батарэй ЗРПК «Панцыр-С1».

Нагадаем, частковая мабілізацыя была абвешчаная на Украіне напярэдадні. Ва ўзброеныя сілы плануецца прызваць 20 тысяч чалавек і столькі ж - у Нацыянальную гвардыю, якая спешна ствараецца на аснове ўнутраных войскаў.