Масква заклапацілася «праблемай 200 тысяч рускіх» у Прыднястроўі
28- 18.03.2014, 17:31
- 34,316
Урад Расеі 20 сакавіка разгледзіць пытанне аб падтрымцы Прыднястроўя.
Пра гэта паведаміў віцэ-прэм'ер Дзмітрый Рагозін, перадае "Інтэрфакс".
"Прэзідэнт Прыднястроўя на мінулым тыдні быў у Маскве. Я з ім сустракаўся, чакаем яго ў цяперашні час у Маскве. Па сутнасці справы, Украіна сёння абвясціла блакаду Прыднястроўю: перакрытая мяжа паміж Украінай і Прыднястроўем для ўсіх мужчын ад 18 да 65 гадоў з расейскім грамадзянствам. Гэта - найгрубейшае парушэнне статусу Украіны ў якасці ўдзельніка перамоўнага працэсу і гаранта міратворчасці", - заявіў Рагозін журналістам у аўторак перад зваротам Уладзіміра Пуціна да Федэральнага Сходу.
Рагозін падкрэсліў, што ізаляцыя Прыднястроўя, дзе пражывае 200 тыс. расейскіх грамадзян і 70 тыс. грамадзян Украіны, недапушчальная.
"Мы гэта, вядома, будзем абмяркоўваць ва ўрадзе і, вядома, з кіраўніком расейскай дзяржавы. Ва ўрадзе ўжо 20 чысла правядзем сур'ёзную вялікую сустрэчу з усімі профільнымі міністэрствамі і ведамствамі Расеі з тым, каб прыднястроўскае кiраўнiцтва адчула наяўнасць групы дарадцаў з боку расейскага ўрада ў тым, што тычыцца пытання, як перажыць эканамічную блакаду", - сказаў Рагозін.
На яго думку, сітуацыя ў Прыднястроўі можа ўскладніцца яшчэ больш у выпадку, калі Малдова падпіша пагадненне з ЕЗ.
"Кішынёў, па сутнасці справы, увогуле не думае пра Прыднястроўе і ўсімі сваімі дзеяннямі паказвае, што гэта ўжо не яго зямля. Вось, зыходзячы з гэтай рэальнасці мы будзем рабіць высновы", - падкрэсліў віцэ-прэм'ер.
Адказваючы на пытанне, як адрэагуе ўрад на магчымую просьбу Прыднястроўя аб уваходжанні ў склад Расеі, Рагозін заявіў, што "не хацеў бы сваімі выказваннямі стымуляваць прыднястроўскіх калегаў да некаторых дзеянняў". "Мы ўсе знаходзімся ў вельмі няпростай сітуацыі, і кошт кожнага слова вельмі высокі. Мы будзем рэагаваць зыходзячы з таго, як будзе сфармуляваны зварот", - сказаў Рагозін.
Фота: argumentiru.com