У Севастопалі ўзялі штурмам штаб ВМС Украіны
12- 19.03.2014, 11:12
- 27,855
У Мінабароны Украіны паведамляюць, што афіцэры, як могуць, стрымліваюць натоўп.
У Севастопалі ў сераду раніцай грамадзянскія завалілі плот і зайшлі на тэрыторыю штаба камандавання ваенна-марскіх сіл Украіны, паведамляе «Украинская правда».
Пра гэта выданню паведаміў кіраўнік медыя-цэнтра Мінабароны Украіны ў Крыме Уладзіслаў Селязнёў.
Паводле яго слоў, мужчыны завалілі плот, і натоўп уварваўся ўнутр. Па стане на 9:00 людзі знаходзяцца на тэрыторыі.
"Афіцэры, як могуць, стрымліваюць гэтую масу людзей, каб яны не расцякаліся па тэрыторыі", - сказаў ён.
"Ну вядома, што нашы ўкраінскія афіцэры супраць жанчын сілу прымяняць не стануць", - падкрэсліў Селязнёў.
Ён дадаў, што пракрамлёўскіх узброеных людзей няма. "Ёсць розныя людзі і ў масках і без масак, але ўзброеных няма", - сказаў ён.
Селязнёў таксама дадаў, што ў іншых кропках ноч прайшла спакойна.
"Усюды нашых вайскоўцаў спрабуюць угаварыць перайсці на бок ЧФ РФ або ісці на мацерыковую частку Украіны", - дадаў ён.
Раней кіраўнік Цэнтра ваенна-палітычных даследаванняў Дзмітрый Тымчук на сваёй старонцы ў "Фэйсбуку" паведамляў, што паводле аператыўных дадзеных суполкі "Інфармацыйны супраціў", яшчэ да 9:00 "самаабарона Крыма" пачала штурм штаба ВМС Украіны. Нападнікаў прыкладна 200 чалавек, сярод іх, акрамя баевікоў, жанчыны.
"Украінскія афіцэры забарыкадаваліся ў памяшканнях. Нават пасля ўчорашняга дазволу Мінабароны Украіны нашым вайскоўцам ужываць зброю прысутнасць жанчын сярод нападнікаў робіць абарону складанай", - піша Цімчук.