Таццяна Догілева: Я зараз таксама «пятая калона»?

Расейская актрыса выступіла супраць акупацыі Крыма.

Пра гэта яна напісала ў блогу на snob.ru.

«Маё жыццё было ўсякім: і шчаслівым, і нешчаслівым, а часам проста вельмі нешчаслівым.

Нашаму пакаленню шмат усяго выпала, знікла адна краіна, з'явілася іншая, а цяпер вось зноў з'яўляецца тая, ранейшая. Толькі ўжо без усяго добрага, што было ў ёй.

Мы ж тады, напрыклад, не ведалі, што ездзіць глядзець іншыя краіны і кантыненты - гэта ў парадку рэчаў для грамадзян квітнеючых краін, гэта хобі ў іх, а то і проста жыццёвая неабходнасць, вось не могуць яны ніяк пражыць, не паглядзеўшы, напрыклад, Індыі. Дзіўна нам усё гэта было.

Потым жалезная заслона павалілася і свет нам адкрыўся. Вось і цяпер я сяджу ў гарачай Дамінікане, а ў Маскве праходзіць мітынг супраць вайны. Хтосьці, праўда, і «за» выкрочвае.

Калі ўжо зусім дрэнна бывала, я заўсёды думала: «Усё-ткі хоць і цяжка, але не так, як у іншыя часы, да мяне. Вайны няма, Сталіна няма».

А вось ніколі не кажы «ніколі». Цяпер вось і вайна практычна на парозе, і Сталін у пашане, ды і жалезная заслона, падобна, вось-вось накрые па новай. Так бы мовіць, «Сардэчна запрашаем на дыскатэку сямідзесятых!»

І зноў па целіку трындзяць, што вакол нашай краіны адны праклятыя ворагі, толькі цяпер і ўкраінцы ворагамі раптам сталі.

А я акурат перад Дамініканай ездзіла ў Кіеў на здымкі, на ТБ мясцовае, я яшчэ іх спытала: «А я вам навошта? У нас накшталт як вайна пачынаецца?» Мне неяк сорамна было да іх ехаць. А яны нават не зразумелі, пра што я. «Не верце нікому, Т. А., у нас усё вельмі спакойна ў Кіеве».

І праўда, слова мне ніхто дрэннага не сказаў, позірку касога не кінуў. Перадача была і на рускай, і на ўкраінскай, ну ніякага ўшчамлення і крыўд рускім я не заўважыла, што вось са мной зробіш?!

А потым і па вуліцах пахадзіла - усё спакойна, горад жыве сваім звычайным жыццём. Я зараз таксама «пятая калона»? Вось толькі за тое, што напісала праўду? Яна цяпер, падобна, не патрэбная нікому, праўда гэтая праклятая, зараз патрыятызм у трэндзе. Ну-ну...

Страшнавата ад усяго гэтага, хлусіць не буду, але толькі я ўжо немаладая, пажыла, шмат чаго бачыла ў жыцці, а вось вам, маладзейшым... Што ж... Зараз вам танчыць пад музыку сямідзесятых, прычым айчыннай вытворчасці музыку, іншую абвесцяць варожай... І саджаць будуць за прагляды фільмаў, якія Мілонаву здадуцца амаральнымі. А яму вунь усё карціць, яму ўсё амаральным здаецца, такая ў яго мараль, некалькі балючая, на мой погляд. Або так ужо нельга пра мілага Мілонава? Можа, і гэта ўжо злачынства супраць патрыятызму?

Кіно зноў стане толькі айчынным, толькі здымацца там будуць тыя самыя 500 (ці колькі?), якія ліст правільны падпісалі. Ну і Бог ім у дапамогу, працаўнікам сцэны і экрана! Хай ужо зайграюцца ў правільных сцэнарах у правільных рэжысёраў. Толькі ўжо без усялякіх там закідонаў! Каб ужо да канца ўсё па правілах, а правілы гэтыя ў Мілонава спытаеце, каб не абмішуліцца незнарок. Я ўжо адздымалася...

Эх, яркая, цёплая Дамінікана! Развітацца, ці што, з табой на вякі вечныя?Ці ўбачымся? Хто ведае...», - напісала яна.

Фота: kinomania.ru