Дэвід Крэмер: Патрэбныя санкцыі супраць «Газпрама», «Лукойла» і «Раснафты»
38- 19.03.2014, 15:25
- 41,249
Пуціна спыніць толькі жорсткая пазіцыя Захаду.
Новыя санкцыі, несумненна, спатрэбяцца, паколькі ў апублікаваным спісе чыноўнікаў "не хапае некалькіх вядучых імёнаў", адзначае ў сваім каментары выданню The Washington Post (пераклад — Inopressa.ru) кіраўнік Freedom House Дэвід Крэмер.
Пакуль што Белы дом увёў санкцыі супраць двух уплывовых дарадцаў Пуціна Уладзіслава Суркова і Сяргея Глазьева, віцэ-прэм'ера Дзмітрыя Рагозіна і чатырох парламентароў, уключаючы спікера Савета Федэрацыі. Аўтар артыкула таксама прапануе ўнесці ў спіс наступных службовых асоб: кіраўніка адміністрацыі Пуціна Сяргея Іванова, дырэктара ФСБ Аляксандра Бортнікава, міністра абароны Сяргея Шайгу, спікера Дзярждумы Сяргея Нарышкіна і ўсіх членаў Савета Федэрацыі, якія галасавалі за выкарыстанне сілы на Украіне.
Каб па-сапраўднаму дамагчыся ўвагі Пуціна і яго атачэння, ЗША і Еўразвяз павінны ўзяцца за яго галоўных "донараў", мяркуе Крэмэр і пералічвае іх: кіраўнік "Раснафты" Ігар Сечын, кіраўнік "Газпрама" Аляксей Мілер, прэзідэнт "Лукойла" Вагіт Алекпераў, кіраўнік Volga Group Генадзь Цімчанка, Юрый Кавальчук і Мікалай Шамалаў з банка "Расея", кіраўнік "Расабаронэкспарта" Сяргей Чэмезаў.
Кіраўнік Freedom House таксама настойвае на тым, што ўзначаліць спіс у хуткім часе павінен сам Уладзімір Пуцін, нагадваючы аб тым, што спіс беларускіх чыноўнікаў, якія падвергліся санкцыям, узначальвае Лукашэнка.
"Пакуль Пуцін і яго атачэнне не заплацяць сур'ёзную цану за свае дзеянні, яны наўрад ці адступяць і могуць нават прычыніць новую шкоду, апроч той, якую яны ўжо нанеслі Украіне", - перасцерагае Крэмер.