Назіральнікі: Датэрміновыя «выбары» пачаліся з масавых фальсіфікацый
58- 19.03.2014, 16:53
- 54,949
У першы дзень датэрміновага галасавання на выбарах «дэпутатаў» назіральнікі паведамілі аб масавых фальсіфікацыях.
Яны зафіксаваныя ў Ленінскім раёне Менска, перадае БелаПАН.
Прадстаўнікі кампаніі «Праваабаронцы за свабодныя выбары», у прыватнасці, інфармуюць, што на ўчастку №19 назіральнікі налічылі 68 прагаласаваўшых выбаршчыкаў (на тэрыторыі ўчастка знаходзіцца студэнцкі інтэрнат), а ў пратаколе камісіі значыцца 93 прагаласаваўшых; на ўчастку №17 прагаласавала 18 выбаршчыкаў, а ў пратаколе камісіі значыцца 52; на ўчастку №15 прагаласавала 9, а камісія паказала ў пратаколе 39 прагаласаваўшых.
Але, адзначаюць у кампаніі, найбольш маштабная фальсіфікацыя прайшла на участках № 12 і 13, якія знаходзяцца ў школе №139 па праспекце Ракасоўскага. На ўчастку №12 назіральнік, якi ажыццяўляў "бесперапыннае суцэльнае назіранне", налічыў усяго 16 прагаласаваўшых, а камісія згодна з пратаколам налічыла 106 выбаршчыкаў.
На ўчастку №13, па дадзеных незалежных назіральнікаў, прагаласавала 12 чалавек, а камісія ў пратаколе паказала 88.
20 сакавіка назіральнікі маюць намер падаць скаргі аб масавых фальсіфікацыях ў Ленінскую раённую выбарчую камісію і пракуратуру.