Пастаянны прадстаўнік Украіны ў СНД склаў з сябе паўнамоцтвы
1- 20.03.2014, 12:04
- 5,730
Старшынства ў Садружнасці павінна перайсці да сустаршыняў СНД, якімі з'яўляюцца ў цяперашні час Беларусь і Казахстан.
Пастаянны паўнамоцны прадстаўнік Украіны ў органах Садружнасці незалежных дзяржаў (СНД) Іван Бунечка склаў з сябе паўнамоцтвы.
У ноце, перададзенай у выканкам Садружнасці ў Менску, гаворыцца, што "ўкраінскі бок выказвае глыбокае шкадаванне ў сувязі з тым, што СНД замест рэалізацыі сваіх задач па наладжванні супрацоўніцтва і ўрэгуляванні канфліктных сітуацый на постсавецкай прасторы ператварылася ў інструмент рэалізацыі інтарэсаў асобных яго членаў", перадае ІТАР-ТАСС.
Як растлумачыў журналістам старшыня выканкама СНД Сяргей Лебедзеў, старшынства ў Садружнасці ў адпаведнасці з працэдурай павінна перайсці да сустаршыняў СНД, якімі з'яўляюцца ў цяперашні час Беларусь і Казахстан.
Учора на пасяджэнні Савета нацыянальнай бяспекі і абароны было прынятае рашэнне аб прыпыненні членства Украіны ў СНД.
Нягледзячы на тое, што Украіна была адной з заснавальніц СНД па выніку падпісання Белавежскага пагаднення ў 1991 годзе, яна не ратыфікавала Статут СНД, таму дэ-юрэ яна не з'яўляецца дзяржавай-членам Садружнасці, аднак мае статус назіральніка ў Садружнасці.