ЕЗ адмяняе саміт з Расеяй і пашырае «чорны спіс»
7- 20.03.2014, 19:10
- 15,775
Запланаваны чэрвеньскі саміт Расеі і Еўразвязу адмяняецца праз украінскі крызіс.
Аб гэтым паведаміў Прэзідэнт Францыі Франсуа Аланд, паведамляе РБК-Украіна.
«Меркавалася, што адбудзецца саміт ЕЗ і Расеі, але ў гэтых умовах гэта немагчыма», - заявіў Аланд.
Лідэры краін ЕЗ таксама заявілі, што маюць намер пашырыць спіс імёнаў расейскіх палітыкаў, якія падпадаюць пад санкцыі, якія прадугледжваюць візавыя абмежаванні і замарожванне рахункаў.
«Тое, што зрабіла Расея, непрымальна, і краіны ЕЗ павінны пазначыць гэта ясна і ўзгоднена», - сказаў прадстаўнікам СМІ прэм'ер-міністр Вялікабрытаніі Дэвід Кэмеран, які прыбыў на двухдзённы саміт у Брусэль.
Тым часам канцлерка Нямеччыны Ангела Меркель, якая таксама прыбыла на саміт у Брусэлі, заявіла, што ў выпадку далейшай эскалацыі канфлікту Еўропа гатова да ўвядзення новых санкцый супраць Расеі.
«Мы таксама хочам ясна даць зразумець, што ў выпадку далейшай эскалацыі мы гатовыя ўвесці эканамічныя санкцыі», - заявіла канцлерка.