Віталь Клічко: Калі мы праглынем страту Крыма, наступным будзе Кіеў

Пуцін цяпер робіць усё, каб ва Украіне панаваў хаос.

Прэзідэнт Расеі дамагаецца таго, каб украінцы не змаглі выбраць прэзідэнта. Такое меркаванне лідар партыі УДАР Віталь Клічко выказаў у эфіры "Свободы слова", паведамляе прэс-служба партыі.

Па словах палітыка, гэта дазволіць Расеі і далей уплываць на ўнутраныя працэсы ў краіне. Акрамя таго, на яго думку, Расеі неабходнае панаванне не толькі на Усходзе і Поўдні Украіны. «Задача - Кіеў і гэта трэба дакладна разумець. Калі мы сёння праглынем Крым, то далей могуць быць іншыя дзеянні ў дачыненні не толькі Украіны», - сказаў палітык.

На думку лідара партыі УДАР, сапраўдная мэта Пуціна - не Крым, яго сумніўная мэта - упісаць уласнае імя ў гісторыю як «збіральніка рускіх земляў». «І заявы Пуціна пра тое, што Кіеў - руская зямля, з'яўляецца таму пацвярджэннем. Расейскія СМІ працягваюць называць сваіх грамадзян, якія падбухторваюць сепаратызм ва Усходніх і Паўднёвых абласцях нашай краіны, барацьбітамі з фашыстамі і радыкаламі. Іх мэта - дэстабілізаваць сітуацыю, і нам трэба быць гатовымі, што іх задача максімум не Данецк, Харкаў або Луганск, іх задача - Кіеў. І мы павінны супрацьстаяць магчымай агрэсіі», - адзначыў палітык.

«Крым мы зможам вярнуць назад праз некаторы час, калі расейскі аўтарытарызм перастане дзейнічаць», - лічыць Клічко.

Таксама ён дадаў, што трэба стабілізаваць сітуацыю і прымусіць Расею зрабіць Крым дэмілітарызаванай зонай, каб там не было ніякіх войскаў, уключаючы Чарнаморскі флот.

Каб захапіць уладу ў Крыме, Расейская Федэрацыя выкарыстала зручны для яе момант, калі ва Украіне яшчэ не існавала сфармаваная выразная вертыкаль улады пасля падзення рэжыму Януковіча.

«Расея ўжо даўно праводзіла ў Крыме прамую незавэлюмаваную агітацыю, выдачу расейскіх пашпартоў. Доўгі час расейскія тэлеканалы падагравалі антыўкраінскія настроі. І многія ўкраінскія палітыкі таксама прама, не хаваючы, распаўсюджвалі непраўдзівую антыўкраінскую інфармацыю», - адзначыў Клічко.

Ён перакананы, што спыніць расейскі аўтарытарызм змогуць самі грамадзяне Расеі. «Мітынг у падтрымку Украіны ў Маскве сабраў значна больш людзей, чым мітынг на Балотнай плошчы. Гэта дэманструе, што ў Расеі, нягледзячы на замбіяванне грамадзян праўладнымі СМІ, у грамадстве існуюць пратэстныя настроі. Упэўнены, што расейцы змогуць спыніць аўтарытарызм у Расеі», - сказаў Віталь Клічко.

Паводле яго слоў, Кіеў павінен тэрмінова забяспечыць усе ўмовы і зрабіць усё магчымае для таго, каб вывесці нашых вайскоўцаў і членаў іх сем'яў на месцы часовай дыслакацыі ваенных частак па-за тэрыторыяй Крыма. «Чым даўжэй адцягваецца працэс вываду вайскоўцаў, тым большы ціск на іх аказваецца. Мы бачым, што многія вайсковыя часткі цяпер без электразабеспячэння, без вады, пад шалёным псіхалагічным ціскам. Я звяртаўся да Галоўнакамандуючага з просьбай актывізаваць працу па вывядзенні вайскоўцаў, якія знаходзяцца ў Крыме, на мацерыковую частку Украіны», - адзначыў Клічко.

У гэты ж час, адказваючы на пытанне аб сепаратысцкіх настроях сярод часткі насельніцтва Усходу Украіны, Клічко адзначыў, што гэта - інспіраваная сітуацыя і ўплыў расейскіх СМІ, якія распаўсюджваюць ілжывую інфармацыю ў традыцыях прапаганды Савецкага Саюза. «Мы павінны гаварыць з людзьмі на Усходзе і Поўдні, бо ранейшая ўлада і прарасейскія СМІ рабілі ўсё, каб сутыкнуць людзей у пытаннях мовы, нацыянальнасці, самакіравання. Цяпер нам трэба зрабіць усё, каб самакіраванне запрацавала, правесці дэцэнтралізацыю бюджэту, даць магчымасць суполкам на месцах вырашаць мясцовыя пытанні», - падкрэсліў лідар УДАРу.