Гары Каспараў: Пуціна напалохае толькі пагроза яго ўладзе

Галоўная праблема Захаду ў тым, што яны зыходзяць з таго, што Пуцін і яго атачэнне клапоцяцца аб расейскіх нацыянальных інтарэсах.

Шахматыст Гары Каспараў, старшыня Фонду па правах чалавека са штаб-кватэрай у Нью-Йорку, са старонак The Washington Post звярнуўся да заходніх палітыкаў, раскрытыкаваўшы іх за слабасць і нерашучасць у супрацьстаянні прэзідэнту РФ.

"Калі Уладзімір Пуцін захапіў Крым, ён дзейнічаў насуперак прадказанням многіх вучоных мужоў, палітыкаў і так званых экспертаў. Магчыма, Пуцін не ўразіўся іх здаровым сэнсам і элегантным дыскурсам з нагоды таго, як уварванне і анэксія Крыма пагражае інтарэсам Расеі. Але галоўная праблема Захаду ў тым, што яны зыходзяць з таго, што Пуцін і яго кіруючая эліта клапоцяцца аб расейскіх нацыянальных інтарэсах. А тыя гэтага не робяць, за выключэннем тых нямногіх абласцей, дзе нацыянальныя інтарэсы служаць іх жаданню нажывы", - напісаў Каспараў у сваім артыкуле.

Каспараў прапанаваў спыніць прыслухоўвацца да лекцый прафесараў, якія разважаюць пра тое, што Пуцін будзе ці не будзе рабіць, а замест гэтага пачаць рэагаваць. апазіцыйны дзеяч, які атрымаў харвацкае грамадзянства, асудзіў лідараў Еўропы і "сямёркі" за добраахвотны параліч, заявіўшы, што ім "лягчэй сказаць, што яны нічым не ў стане абмежаваць амбіцыі Пуціна, чым прызнаць, што ў іх не хапае смеласці дзейнічаць". Каспараў нагадаў, што ў заходніх палітыкаў ёсць шмат рычагоў, якія дазваляюць аказаць ціск на Пуціна, але пакуль "Пуцін павышае стаўкі", а Захад проста глядзіць на гэта.

На думку шахматыста, паўплываць на паводзіны Пуціна могуць толькі тыя санкцыі, якія будуць наўпрост ці ўскосна пагражаць яго ўладзе. "Гэта адзінае, што хвалюе Пуціна, таму што ён ведае, што бывае з людзьмі ў яго становішчы, калі яны ўладу страчваюць", - цытуе артыкул InoPressa.

Каспараў мяркуе, што Барак Абама здзейсніў памылку, заявіўшы аб тым, што ЗША не будуць пасылаць войскі на абарону Украіны: "Ніхто не прасіў войскаў, і Абама, верагодна, думае, што ён разрадзіў напружанне. Але там, дзе Абама бачыць дэманстрацыю мірных намераў, Пуцін бачыць слабасць".

"Пуцін не адступіць і не будзе выгнаны, пакуль рэальная пагроза яго ўладзе не створыць раскол сярод яго эліты і дарадцаў. Цяпер у іх няма стымулу рабіць стаўкі супраць яго. Пуцін абараняе іх і іх актывы", - мяркуе апазіцыянер і тлумачыць, што змяненне сітуацыі можа быць адзіным спосабам абараніць Украіну.

Як піша Каспараў, "Абама і еўрапейскія лідары працягваюць гуляць па правілах, нават калі Пуцін разарваў гэтыя правілы і кінуў абрыўкі ім у твар. Крамлёўскія эліты мелі рацыю, калі смяяліся з заходніх санкцый у пачатку тыдня". Пасля ўзмацнення жорсткасці санкцыйных мер, удакладняе шахматыст, смех у Маскве прыціх. А з боку Абамы, на яго думку, было б найлепшым рашэннем падпісаць новыя ўказы, якія дазваляюць выкарыстоўваць больш жорсткія меры: "Гэта пакажа Пуціну, што Захад таксама можа змяніць правілы".

У заключэнне Каспараў раіць заходнім лідарам "сачыць за грашыма": "Калі ласка, увядзіце санкцыі супраць элітаў, якія падтрымліваюць Пуціна, пераследвайце членаў іх сем'яў, з дапамогай якіх яны хаваюць свае ўладанні за мяжой, з дакладнасцю вывучыце іх кампаніі. Калі для таго, каб разабрацца з галаварэзамі-мільярдэрамі, якія патураюць гэтаму небяспечнаму рэжыму, існуючых законаў мала, напішыце новыя. І рабіць гэта трэба хутка, таму што з-за прамаруджвання цана ліквідацыі Пуціна павялічваецца. У рэшце рэшт цана пойдзе не толькі на грошы, якія баяцца страціць краіны Захаду, але і на чалавечыя жыцці".

Нагадаем, Гары Каспараў пражывае за мяжой, тлумачачы, што не жадае станавіцца чарговай ахвярай палітычных рэпрэсій у Расеі і хоча мець магчымасць змагацца з рэжымам прэзідэнта Уладзіміра Пуціна за межамі краіны. Па словах Каспарава, ён "працягвае барацьбу з крамлёўскімі злачынцамі на міжнароднай арэне", каб наблізіць момант падзення пуцінскага рэжыму. Яго спроба атрымаць грамадзянства Латвіі апынулася няўдалай.