Мікалай Аўтуховіч абскардзіў накладзеныя турэмшчыкамі спагнанні

Палітвязень Мікалай Аўтуховіч абскардзіў спагнанні, накладзеныя на яго ў гарадзенскай турме №1.

Як паведаміў БелаПАН праваабаронца Алег Волчак, судом Ленінскага раёна Гародні на папярэднім пасяджэнні 21 сакавіка прызначаны разгляд скаргі на 26 сакавіка.

Мікалай Аўтуховіч павінен выйсці на свабоду 8 красавіка. Пасля гэтага на працягу аднаго года і чатырох месяцаў ён павінен будзе знаходзіцца пад прэвентыўным наглядам - такая пастанова прынятая судом 18 сакавіка. Аднак, калі 26 сакавіка суд адменіць спагнанні, накладзеныя на Аўтуховіча ў турме, можа быць перагледжаная пастанова аб прэвентыўным наглядзе.

На думку Волчака, дамагчыся адмены спагнанняў Аўтуховічу наўрад ці ўдасца. «Мы ведаем адназначна, што ніякага паслаблення не будзе. Але Мікалай сказаў, што ён сур'ёзна рыхтуецца да суда і будзе дамагацца, каб усё гэта было адменена», - сказаў праваабаронца.

Мікалай Аўтуховіч быў арыштаваны 8 лютага 2009 года. У траўні 2010-га за перавозку і захоўванне пяці патронаў да паляўнічай вінтоўкі Вярхоўны суд Беларусі прызнаў яго вінаватым паводле часткі 3 артыкула 295 Крымінальнага кодэкса (незаконныя дзеянні ў дачыненні да агнястрэльнай зброі, боепрыпасаў і выбуховых рэчываў) і прыгаварыў да пяці гадоў і двух месяцаў пазбаўлення волі ва ўмовах строгага рэжыму. У студзені 2012 года суд зрабіў больш жорсткімі Аўтуховічу ўмовы адбыцця пакарання, прызнаўшы яго «злосным парушальнікам рэжыму», пасля чаго асуджанага прадпрымальніка перавялі з калоніі №5 у Івацэвічах (Берасцейская вобласць) у гарадзенскую турму.

Гэта ўжо другая судзімасць Мікалая Аўтуховіча. Першы раз ён быў арыштаваны ў кастрычніку 2005 года паводле абвінавачвання ў няплаце падаткаў і асуджаны на тры з паловай гады пазбаўлення волі. У абодвух выпадках праваабаронцы прызнавалі Аўтуховіча палітвязням, які асуджаным за сваю актыўную грамадскую дзейнасць і барацьбу з карупцыяй.