Штэфан Фюле: Эканамічная частка асацыяцыі будзе падпісаная ў чэрвені
12- 22.03.2014, 18:40
- 7,729
Эканамічная частка пагаднення аб асацыяцыі паміж Украінай і Еўразвязам можа быць падпісаная ўжо ў чэрвені.
Як паведамляе ТСН, пра гэта заявіў камісар ЕЗ у пытаннях пашырэння і палітыкі добрасуседства Штэфан Фюле.
«Яна (эканамічная частка) найважнейшая, але ў той жа час мы бачым важнасць правядзення сумленных і свабодных прэзідэнцкіх выбараў, якія адбудуцца ў траўні. І мы спадзяемся, што праз месяц пасля выбараў мы зможам апынуцца ў найлепшай сітуацыі для завяршэння працэсу падпісання, у тым ліку ўключаючы іншыя важныя часткі пагаднення аб асацыяцыі, якія застаюцца інтэграванымі ў адно пагадненне», - адзначыў ён.
Пры гэтым ён паведаміў, што плануе бліжэйшым часам наведаць Украіну.
«Я планую неўзабаве наведаць Украіну і пагаварыць аб шэрагу рэформаў, са мной паедуць эксперты і калегі з Еўрапейскай камісіі, каб напрацаваць пэўныя «дарожныя карты» ў розных сферах, такіх як гандаль, фінансы, энергетыка, дапамога прамысловасці. І я таксама вельмі зацікаўлены працягваць дыялог з парламентарыямі ў Вярхоўнай Радзе», - заявіў Штэфан Фюле.
Нагадаем, учора Украіна падпісала палітычную частку асацыяцыі з ЕЗ.